harf-e-kun shah-e-rag-e-hu mein gum hai

harf-e-kun shah-e-rag-e-hū meñ gum hai

ik jahāñ zauq-e-numū meñ gum hai

apne hī husn kā akkās hai husn

aa.ina ā.ina-rū meñ gum hai

kaif-āmez hai kaifiyyat-e-hāl

nashsha-e-mai ki subū meñ gum hai

dard chīḳh uThtā hai siine meñ koī

zaḳhm jaise ki lahū meñ gum hai

tiir mat dekh mire zaḳhm ko dekh

yār-e-yār apnā adū meñ gum hai

khol mat band-e-qabā rahne de

chāk-e-dāmān rafū meñ gum hai

nāfa-e-āhū-e-tātār hai ishq

bū-e-gul apnī hī bū meñ gum hai

ḳhaak uḌtī hai sar-e-sāhil jo

tishnagī nahr-e-gulū meñ gum hai

ye bhī kyā ḳhud hai ki ḳhud meñ bhī nahīñ

ye bhī kyā maiñ hai ki tū meñ gum hai

mast huuñ apnī anā meñ maiñ bhī

aur vo apnī hī ḳhū meñ gum he

harf-e-kun shah-e-rag-e-hu mein gum hai

ek jahan zauq-e-numu mein gum hai

apne hi husn ka akkas hai husn

aaina aaina-ru mein gum hai

kaif-amez hai kaifiyyat-e-haal

nashsha-e-mai ki subu mein gum hai

dard chiKH uThta hai sine mein koi

zaKHm jaise ki lahu mein gum hai

tir mat dekh mere zaKHm ko dekh

yar-e-yar apna adu mein gum hai

khol mat band-e-qaba rahne de

chaak-e-daman rafu mein gum hai

nafa-e-ahu-e-tatar hai ishq

bu-e-gul apni hi bu mein gum hai

KHak uDti hai sar-e-sahil jo

tishnagi nahr-e-gulu mein gum hai

ye bhi kya KHud hai ki KHud mein bhi nahin

ye bhi kya main hai ki tu mein gum hai

mast hun apni ana mein main bhi

aur wo apni hi KHu mein gum he