hargiz na ho ai dil gham-e-jaanan ki shikayat

hargiz na ho ai dil ġham-e-jānāñ kī shikāyat

kartā hai bhalā koī bhī mehmāñ kī shikāyat

āzād the kab qaid-e-ġham-ishq se ham ko

zanjīr kā shikva hai na zindāñ kī shikāyat

vo ye na kaheñge ki tumheñ maut na aa.ī

kis muñh se kareñ ham shab-e-hijrāñ kī shikāyat

mashkūr-e-junūñ aap haiñ vahshī tire un ko

mahmil kā gilā hai na bayābāñ kī shikāyat

go sabr qayāmat kā hai darkār par ai dil

yaañ kufr hai us dushman-e-īmāñ kī shikāyat

sharminda kafan ne kiyā is darja ki tā hashr

ab jeb kā shikva hai na dāmāñ kī shikāyat

thā un ke tasavvur meñ bhī ik vasl kā aalam

ho saktī hai phir kyā shab-e-hijrāñ kī shikāyat

kyoñ fikr ho kyā apne kabhī din na phireñge

be-kār hai phir gardish-e-daurāñ kī shikāyat

laḌtā hai havā se bhī koī laakh ḳhafā ho

bejā hai tirī zulf-e-pareshāñ kī shikāyat

haiñ ishq ke bīmār bhī duniyā se nirāle

hai dard ke badle unheñ darmāñ kī shikāyat

in se na sitam kā na taġhāful kā gilā hai

ho jaatī hai haañ pākī-e-dāmāñ kī shikāyat

manzūr nahīñ jab unheñ ḳhud jalva dikhānā

kyoñ kījiye phir hājib o darbāñ kī shikāyat

thā nazar azal hī se dil us jān-e-jahāñ kī

karte raho yuuñ abrū-o-mizhgāñ kī shikāyat

mehmāñ dil-e-'jauhar' kā bilā-izn sidhārā

paikāñ to gayā rah ga.ī paikāñ kī shikāyat

hargiz na ho ai dil gham-e-jaanan ki shikayat

karta hai bhala koi bhi mehman ki shikayat

aazad the kab qaid-e-gham-ishq se hum ko

zanjir ka shikwa hai na zindan ki shikayat

wo ye na kahenge ki tumhein maut na aai

kis munh se karen hum shab-e-hijran ki shikayat

mashkur-e-junun aap hain wahshi tere un ko

mahmil ka gila hai na bayaban ki shikayat

go sabr qayamat ka hai darkar par ai dil

yan kufr hai us dushman-e-iman ki shikayat

sharminda kafan ne kiya is darja ki ta hashr

ab jeb ka shikwa hai na daman ki shikayat

tha un ke tasawwur mein bhi ek wasl ka aalam

ho sakti hai phir kya shab-e-hijran ki shikayat

kyon fikr ho kya apne kabhi din na phirenge

be-kar hai phir gardish-e-dauran ki shikayat

laDta hai hawa se bhi koi lakh KHafa ho

beja hai teri zulf-e-pareshan ki shikayat

hain ishq ke bimar bhi duniya se nirale

hai dard ke badle unhen darman ki shikayat

in se na sitam ka na taghaful ka gila hai

ho jati hai han paki-e-daman ki shikayat

manzur nahin jab unhen KHud jalwa dikhana

kyon kijiye phir hajib o darban ki shikayat

tha nazar azal hi se dil us jaan-e-jahan ki

karte raho yun abru-o-mizhgan ki shikayat

mehman dil-e-'jauhar' ka bila-izn sidhaara

paikan to gaya rah gai paikan ki shikayat