hawa ke waste ek kaam chhoD aaya hun

havā ke vāste ik kaam chhoḌ aayā huuñ

diyā jalā ke sar-e-shām chhoḌ aayā huuñ

kabhī nasīb ho fursat to us ko paḌh lenā

vo ek ḳhat jo tire naam chhoḌ aayā huuñ

havā-e-dasht-o-bayābāñ bhī mujh se barham hai

maiñ apne ghar ke dar-o-bām chhoḌ aayā huuñ

koī charāġh sar-e-rahguzar nahīñ na sahī

maiñ naqsh-e-pā ko bahar-gām chhoḌ aayā huuñ

abhī to aur bahut us pe tabsire hoñge

maiñ guftugū meñ jo ib.hām chhoḌ aayā huuñ

ye kam nahīñ hai vazāhat mirī asīrī kī

paroñ ke rañg tah-e-dām chhoḌ aayā huuñ

vahāñ se ek qadam bhī na jā sakī aage

jahāñ pe gardish-e-ayyām chhoḌ aayā huuñ

mujhe jo DhūñDhnā chāhe vo DhūñDh le 'ejāz'

ki ab maiñ kūcha-e-gum-nām chhoḌ aayā huuñ

hawa ke waste ek kaam chhoD aaya hun

diya jala ke sar-e-sham chhoD aaya hun

kabhi nasib ho fursat to us ko paDh lena

wo ek KHat jo tere nam chhoD aaya hun

hawa-e-dasht-o-bayaban bhi mujh se barham hai

main apne ghar ke dar-o-baam chhoD aaya hun

koi charagh sar-e-rahguzar nahin na sahi

main naqsh-e-pa ko bahar-gam chhoD aaya hun

abhi to aur bahut us pe tabsire honge

main guftugu mein jo ibham chhoD aaya hun

ye kam nahin hai wazahat meri asiri ki

paron ke rang tah-e-dam chhoD aaya hun

wahan se ek qadam bhi na ja saki aage

jahan pe gardish-e-ayyam chhoD aaya hun

mujhe jo DhunDhna chahe wo DhunDh le 'ejaz'

ki ab main kucha-e-gum-nam chhoD aaya hun