hua jab samna us KHub-ru se

huā jab sāmnā us ḳhūb-rū se

uḌā hai rañg gul kā pahle bū se

ye āñkheñ tar jo rahtī haiñ lahū se

vo guzre ishq ke din aabrū se

ise kahiye shahādat-nāma-e-ishq

use likkhā hai ḳhat apne lahū se

dhuāñ ban kar uḌī missī kī rañgat

ye kis ne jal ke tere hoñT chūse

raqīboñ ko tamannā hai to bāshad

tumheñ matlab parā.ī aarzū se

vo gul-takiya mire marqad meñ rakhnā

mo.attar ho jo zulf-e-mushk-bū se

na.ī zid hai ki dil ham muft leñge

bhalā kyā fā.eda is guftugū se

adū bhī tum ko chāhe ai tirī shaan

laḌāte haiñ ham apnī aarzū se

huā hai tū to shāhid-bāz ai dil

bachā.ūñ tujh ko kis kis ḳhūb-rū se

lagā rakkhī hai ḳhaak us rahguzar kī

tayammum apnā baḌh kar hai vuzū se

hamārā dil use ab DhūñDtā hai

thake haiñ paañv jis kī justujū se

ḳhudā jaane chhalāvā thā ki bijlī

abhī niklā hai koī rū-ba-rū se

huā hai 'dāġh' aasif kā namak-ḳhvār

guzar jaa.e ilāhī aabrū se

hua jab samna us KHub-ru se

uDa hai rang gul ka pahle bu se

ye aankhen tar jo rahti hain lahu se

wo guzre ishq ke din aabru se

ise kahiye shahadat-nama-e-ishq

use likkha hai KHat apne lahu se

dhuan ban kar uDi missi ki rangat

ye kis ne jal ke tere honT chuse

raqibon ko tamanna hai to bashad

tumhein matlab parai aarzu se

wo gul-takiya mere marqad mein rakhna

moattar ho jo zulf-e-mushk-bu se

nai zid hai ki dil hum muft lenge

bhala kya faeda is guftugu se

adu bhi tum ko chahe ai teri shan

laDate hain hum apni aarzu se

hua hai tu to shahid-baz ai dil

bachaun tujh ko kis kis KHub-ru se

laga rakkhi hai KHak us rahguzar ki

tayammum apna baDh kar hai wuzu se

hamara dil use ab DhunDta hai

thake hain panw jis ki justuju se

KHuda jaane chhalawa tha ki bijli

abhi nikla hai koi ru-ba-ru se

hua hai 'dagh' aasif ka namak-KHwar

guzar jae ilahi aabru se