ek be-wafa ko pyar kiya hae kya kiya

ik be-vafā ko pyaar kiyā haa.e kyā kiyā

ḳhud dil ko be-qarār kiyā haa.e kyā kiyā

mā'lūm thā ki 'ahd-e-vafā un kā jhuuT hai

is par bhī e'tibār kiyā haa.e kyā kiyā

vo dil ki jis pe qīmat-e-kaunain thī nisār

nazr-e-nigāh-e-yār kiyā haa.e kyā kiyā

ḳhud ham ne faash faash kyā rāz-e-āshiqī

dāman ko taar taar kiyā haa.e kyā kiyā

aaheñ bhī baar baar bharīñ un ke hijr meñ

naala bhī baar baar kiyā haa.e kyā kiyā

miTne kā ġham nahīñ hai bas itnā malāl hī

kyuuñ terā intizār kiyā haa.e kyā kiyā

ham ne to ġham ko siine se apne lagā liyā

ġham ne hameñ shikār kiyā haa.e kyā kiyā

sayyād kī razā ye ham aañsū na pī sake

uzr-e-ġham-bahār kiyā haa.e kyā kiyā

qismat ne aah ham ko ye din bhī dikhā diye

qismat pe e'tibār kiyā haa.e kyā kiyā

rañgīnī-e-ḳhayāl se kuchh bhī na bach sakā

har shai ko pur-bahār kiyā haa.e kyā kiyā

dil ne bhulā bhulā ke tirī bevafā.iyāñ

phir 'ahd ustuvār kiyā haa.e kyā kiyā

un ke sitam bhī sah ke na un se kyā gila

kyuuñ jabr iḳhtiyār kiyā haa.e kyā kiyā

kāfir kī chashm-e-nāz pe kyā dil-jigar kā zikr

īmān tak nisār kiyā haa.e kyā kiyā

kaalī ghaTā ke uThte hī tauba na rah sakī

tauba pe e'tibār kiyā haa.e kyā kiyā

shām-e-firāq qalb ke dāġhoñ ko gin liyā

tāroñ ko bhī shumār kiyā haa.e kyā kiyā

'bahzād' kī na qadar koī tum ko ho sakī

tum ne zalīl-o-ḳhvār kiyā haa.e kyā kiyā

ek be-wafa ko pyar kiya hae kya kiya

KHud dil ko be-qarar kiya hae kya kiya

ma'lum tha ki 'ahd-e-wafa un ka jhuT hai

is par bhi e'tibar kiya hae kya kiya

wo dil ki jis pe qimat-e-kaunain thi nisar

nazr-e-nigah-e-yar kiya hae kya kiya

KHud hum ne fash fash kya raaz-e-ashiqi

daman ko tar tar kiya hae kya kiya

aahen bhi bar bar bharin un ke hijr mein

nala bhi bar bar kiya hae kya kiya

miTne ka gham nahin hai bas itna malal hi

kyun tera intizar kiya hae kya kiya

hum ne to gham ko sine se apne laga liya

gham ne hamein shikar kiya hae kya kiya

sayyaad ki raza ye hum aansu na pi sake

uzr-e-gham-bahaar kiya hae kya kiya

qismat ne aah hum ko ye din bhi dikha diye

qismat pe e'tibar kiya hae kya kiya

rangini-e-KHayal se kuchh bhi na bach saka

har shai ko pur-bahaar kiya hae kya kiya

dil ne bhula bhula ke teri bewafaiyan

phir 'ahd ustuwar kiya hae kya kiya

un ke sitam bhi sah ke na un se kya gila

kyun jabr iKHtiyar kiya hae kya kiya

kafir ki chashm-e-naz pe kya dil-jigar ka zikr

iman tak nisar kiya hae kya kiya

kali ghaTa ke uThte hi tauba na rah saki

tauba pe e'tibar kiya hae kya kiya

sham-e-firaq qalb ke daghon ko gin liya

taron ko bhi shumar kiya hae kya kiya

'bahzad' ki na qadar koi tum ko ho saki

tum ne zalil-o-KHwar kiya hae kya kiya