الہام صوت پا کے اذانوں تک آ گیا

الہام صوت پا کے اذانوں تک آ گیا

جتنا بھی دل کا شور تھا کانوں تک آ گیا

اس پار جس قدر بھی غبار وجود تھا

پہلی نظر میں آئنہ خانوں تک آ گیا

ہر دستیاب زخم رہین ہنر کیا

پھر میں کتاب بن کے دکانوں تک آ گیا

مانا کہ میرے ہاتھ پہ دستک ادھار تھی

لیکن یہ کیا کہ خالی مکانوں تک آ گیا

کم قامتی کا دکھ مجھے لایا صلیب تک

اترا صلیب سے تو زمانوں تک آ گیا

کیا جانے جوئے خوں نکل آئے کہ جوئے شیر

تیشے میں آگ تھی سو چٹانوں تک آ گیا

نا دیدنی طواف کی تائید کس سے لیں

پیر حرم کا خوف جوانوں تک آ گیا

ہوتی ہے بازگشت بھی کس اہتمام سے

چہرہ بجھا تو نام زبانوں تک آ گیا