jahan-e-jubba-o-dastar ki himayat kya

jahān-e-jubba-o-dastār kī himāyat kyā

yazīd-e-vaqt hai kyā aur us kī bai'at kyā

munāfiqāna ravish aam hotī jaatī hai

naqāb-poshī-e-ahbāb kī shikāyat kyā

kisī bhī shaḳhs ko ab harf-e-haq kā paas nahīñ

panap rahā hai yahāñ par daroġh-e-hikmat kyā

mujāvirān-e-jahālat ke bālā-ḳhānoñ meñ

suḳhan-tarāzi-e-ilm-o-adab kī qīmat kyā

maza to jab hai ki rañg-e-suḳhan ho vaj.h-e-numūd

jo ishtihār kī muhtāj ho vo shohrat kyā

mire rafīq faroġh-e-junūñ ke aalam meñ

hai chaak chaak garebāñ to is pe hairat kyā

jo mil rahā hai tumheñ ġhair kī ināyat se

yahī hai saañs to is saañs kī hai qīmat kyā

zabāñ bhī ek zamīñ bhī hai ek rañg bhī ek

to phir miyāñ man-o-tū kī ye ajnabiyyat kyā

jhapaT rahe haiñ sabhī sīm-o-zar ke luqmoñ par

havas-girī hai faqat mansab-e-vazārat kyā

siyāh daaġh haiñ ye raushnī ke chehre par

murīd-e-jehl hai kyā pesha-e-tarīqat kyā

azal se 'baḳhsh' rah-e-pur-ḳhatar se guzre haiñ

jafā-shanāsi-e-ahbāb kī shikāyat kyā

jahan-e-jubba-o-dastar ki himayat kya

yazid-e-waqt hai kya aur us ki bai'at kya

munafiqana rawish aam hoti jati hai

naqab-poshi-e-ahbab ki shikayat kya

kisi bhi shaKHs ko ab harf-e-haq ka pas nahin

panap raha hai yahan par darogh-e-hikmat kya

mujaviran-e-jahaalat ke baala-KHanon mein

suKHan-taraazi-e-ilm-o-adab ki qimat kya

maza to jab hai ki rang-e-suKHan ho wajh-e-numud

jo ishtihaar ki muhtaj ho wo shohrat kya

mere rafiq farogh-e-junun ke aalam mein

hai chaak chaak gareban to is pe hairat kya

jo mil raha hai tumhein ghair ki inayat se

yahi hai sans to is sans ki hai qimat kya

zaban bhi ek zamin bhi hai ek rang bhi ek

to phir miyan man-o-tu ki ye ajnabiyyat kya

jhapaT rahe hain sabhi sim-o-zar ke luqmon par

hawas-giri hai faqat mansab-e-wazarat kya

siyah dagh hain ye raushni ke chehre par

murid-e-jehl hai kya pesha-e-tariqat kya

azal se 'baKHsh' rah-e-pur-KHatar se guzre hain

jafa-shanasi-e-ahbab ki shikayat kya