jhagDe KHuda se ho gae ahd-e-shabab mein

jhagḌe ḳhudā se ho ga.e ahd-e-shabāb meñ

tab se gire paḌe haiñ jahān-e-ḳharāb meñ

kab kā vo jā chukā thā khulī aañkh jab mirī

maiñ us ko dekhtā hī rahā jaise ḳhvāb meñ

rañgīni-e-libās kā jamm-e-ġhafīr hai

shāyad ki maiñ na aa.uuñ tire intiḳhāb meñ

mujh par zakāt husn-e-suḳhan kī huī hai farz

shāmil huā huuñ sher ke ahl-e-nisāb meñ

uTTho ki ā.īna bhī kahīñ kā kahīñ gayā

rah jāoge yahīñ jo rahoge hijāb meñ

shāyad qalam davāt kī fursat na ho use

mere hī ḳhat ko bhej diyā hai javāb meñ

chhup-chhup ke dekhtā thā taġhāful kī aaḌ meñ

us ne barat liyā hai mujhe ijtināb meñ

vo sham-e-intizār kī lau kar gayā mujhe

maiñ raushni-e-taba.a se huuñ pech-o-tāb meñ

aa.iiñ havā.eñ duur se bāġh-e-bahisht kī

ḳhushbū bhī aa.ī der se kār-e-savāb meñ

ā.īna-e-nigāh meñ ta.alīm aur thī

bar-aks ho gayā jo likhā thā kitāb meñ

maiñ rahne vaalā shaam o sahar ke pare kā huuñ

Daalā gayā huuñ shaam o sahar ke hisāb meñ

is be-hisī ke biich meñ 'ehsās' kī ġhazal

dekho to ye sukūt suḳhan ke javāb meñ

jhagDe KHuda se ho gae ahd-e-shabab mein

tab se gire paDe hain jahan-e-KHarab mein

kab ka wo ja chuka tha khuli aankh jab meri

main us ko dekhta hi raha jaise KHwab mein

rangini-e-libas ka jamm-e-ghafir hai

shayad ki main na aaun tere intiKHab mein

mujh par zakat husn-e-suKHan ki hui hai farz

shamil hua hun sher ke ahl-e-nisab mein

uTTho ki aaina bhi kahin ka kahin gaya

rah jaoge yahin jo rahoge hijab mein

shayad qalam dawat ki fursat na ho use

mere hi KHat ko bhej diya hai jawab mein

chhup-chhup ke dekhta tha taghaful ki aaD mein

us ne barat liya hai mujhe ijtinab mein

wo sham-e-intizar ki lau kar gaya mujhe

main raushni-e-taba se hun pech-o-tab mein

aain hawaen dur se bagh-e-bahisht ki

KHushbu bhi aai der se kar-e-sawab mein

aaina-e-nigah mein talim aur thi

bar-aks ho gaya jo likha tha kitab mein

main rahne wala sham o sahar ke pare ka hun

Dala gaya hun sham o sahar ke hisab mein

is be-hisi ke bich mein 'ehsas' ki ghazal

dekho to ye sukut suKHan ke jawab mein