jis ne tujh husn par nigah kiya

jis ne tujh husn par nigāh kiyā

nūr-e-ḳhurshīd farsh-e-rāh kiyā

haq ne apne karam satī muj kuuñ

mulk-e-ḳhūbī kā pādshāh kiyā

mashq-e-ġhaflat se tīra-bātin ne

safha-e-zindagī siyāh kiyā

hauz-e-kausar kā tishna-lab kab hai

is zanaḳhdāñ kī jis ne chaah kiyā

kūcha-e-zulf meñ gayā jab dil

barg-e-sumbul kuuñ zād-e-rāh kiyā

barq-e-ḳhirman hai jān-e-dushman kā

dard siiñ jis ne ek aah kiyā

mat jalā ab 'sirāj' kuuñ zālim

shola-e-ġham kuuñ uzr-ḳhvāh kiyā

jis ne tujh husn par nigah kiya

nur-e-KHurshid farsh-e-rah kiya

haq ne apne karam sati muj kun

mulk-e-KHubi ka padshah kiya

mashq-e-ghaflat se tira-baatin ne

safha-e-zindagi siyah kiya

hauz-e-kausar ka tishna-lab kab hai

is zanaKHdan ki jis ne chah kiya

kucha-e-zulf mein gaya jab dil

barg-e-sumbul kun zad-e-rah kiya

barq-e-KHirman hai jaan-e-dushman ka

dard sin jis ne ek aah kiya

mat jala ab 'siraj' kun zalim

shola-e-gham kun uzr-KHwah kiya