jo beach mein aaina ho pyare idhar hamare udhar tumhaare

jo beach meñ aa.ina ho pyāre idhar hamāre udhar tumhāre

to phir hoñ bāham-digar nazāre idhar hamāre udhar tumhāre

jo kuchh guzartī hai dil pe pyāre idhar hamāre udhar tumhāre

kaheñ vo kis se adū haiñ saare idhar hamāre udhar tumhāre

chale vo bād-e-murād hamdam jo bahr-e-ġham se nikāle bāham

ḳhushī ke bajre lageñ kināre idhar hamāre udhar tumhāre

ḳhushī thī ḳhalvat-nashīñ the bāham muḳhil huā ġhair aa ke jis dam

to hosh-o-aql-o-ḳhirad sidhāre idhar hamāre udhar tumhāre

nasīb agar phir huī vo sohbat baham jo guzrī miyān-e-ishrat

to kaam bigḌe ḳhudā sañvāre idhar hamāre udhar tumhāre

ḳhudā dikhā.e jo vasl kī shab ḳhushī se gul-gul shagufta hoñ sab

jo daaġh dil par haiñ ġham ke maare idhar hamāre udhar tumhāre

milā hai tum ko jo shahr-e-ḳhūbī to mulk-e-ġham ke haiñ ham bhī vaalī

hue haiñ kishvar do ujāre idhar hamāre udhar tumhāre

jo baat karte na ġhair dete jhukā ke āñkheñ hī dekh lete

ki hote bāham-digar ishāre idhar hamāre udhar tumhāre

ḳhabar na afshāñ kī ham jhalak se na tum ḳhabar dard kī chamak se

kuchh in dinoñ meñ bure sitāre idhar hamāre udhar tumhāre

nikālo vaslat kī tum jo rāheñ karūñ maiñ rah rah ke garm aaheñ

jahāz-e-dūdī lageñ kināre idhar hamāre udhar tumhāre

ḳhudā uThā.e ye parda-e-ġham jo mil ke ham tum hoñ 'shād' bāham

to kaisī shādī ho ghar meñ pyāre idhar hamāre udhar tumhāre

jo beach mein aaina ho pyare idhar hamare udhar tumhaare

to phir hon baham-digar nazare idhar hamare udhar tumhaare

jo kuchh guzarti hai dil pe pyare idhar hamare udhar tumhaare

kahen wo kis se adu hain sare idhar hamare udhar tumhaare

chale wo baad-e-murad hamdam jo bahr-e-gham se nikale baham

KHushi ke bajre lagen kinare idhar hamare udhar tumhaare

KHushi thi KHalwat-nashin the baham muKHil hua ghair aa ke jis dam

to hosh-o-aql-o-KHirad sidhaare idhar hamare udhar tumhaare

nasib agar phir hui wo sohbat baham jo guzri miyan-e-ishrat

to kaam bigDe KHuda sanware idhar hamare udhar tumhaare

KHuda dikhae jo wasl ki shab KHushi se gul-gul shagufta hon sab

jo dagh dil par hain gham ke mare idhar hamare udhar tumhaare

mila hai tum ko jo shahr-e-KHubi to mulk-e-gham ke hain hum bhi wali

hue hain kishwar do ujare idhar hamare udhar tumhaare

jo baat karte na ghair dete jhuka ke aankhen hi dekh lete

ki hote baham-digar ishaare idhar hamare udhar tumhaare

KHabar na afshan ki hum jhalak se na tum KHabar dard ki chamak se

kuchh in dinon mein bure sitare idhar hamare udhar tumhaare

nikalo waslat ki tum jo rahen karun main rah rah ke garm aahen

jahaz-e-dudi lagen kinare idhar hamare udhar tumhaare

KHuda uThae ye parda-e-gham jo mil ke hum tum hon 'shad' baham

to kaisi shadi ho ghar mein pyare idhar hamare udhar tumhaare