juda hon yar se hum aur na ho raqib juda

judā hoñ yaar se ham aur na ho raqīb judā

hai apnā apnā muqaddar judā nasīb judā

tirī galī se nikalte hī apnā dam niklā

rahe hai kyuuñ ki gulistāñ se andalīb judā

dikhā de jalva jo masjid meñ vo but-e-kāfir

to chīḳh uTThe mo.azzin judā ḳhatīb judā

judā na dard-e-judā.ī ho gar mire aazā

hurūf-e-dard kī sūrat huuñ ai tabīb judā

hai aur ilm o adab maktab-e-mohabbat meñ

ki hai vahāñ kā moallim judā adiib judā

hujūm-e-ashk ke hamrāh kyuuñ na ho naala

ki fauj se nahīñ hotā kabhī naqīb judā

firāq-e-ḳhuld se gandum hai sīna-chāk ab tak

ilāhī ho na vatan se koī ġharīb judā

kiyā habīb ko mujh se judā falak ne magar

na kar sakā mire dil se ġham-e-habīb judā

kareñ judā.ī kā kis kis kī ranj ham ai 'zauq'

ki hone vaale haiñ ham sab se an-qarīb judā

juda hon yar se hum aur na ho raqib juda

hai apna apna muqaddar juda nasib juda

teri gali se nikalte hi apna dam nikla

rahe hai kyun ki gulistan se andalib juda

dikha de jalwa jo masjid mein wo but-e-kafir

to chiKH uTThe moazzin juda KHatib juda

juda na dard-e-judai ho gar mere aaza

huruf-e-dard ki surat hun ai tabib juda

hai aur ilm o adab maktab-e-mohabbat mein

ki hai wahan ka moallim juda adib juda

hujum-e-ashk ke hamrah kyun na ho nala

ki fauj se nahin hota kabhi naqib juda

firaq-e-KHuld se gandum hai sina-chaak ab tak

ilahi ho na watan se koi gharib juda

kiya habib ko mujh se juda falak ne magar

na kar saka mere dil se gham-e-habib juda

karen judai ka kis kis ki ranj hum ai 'zauq'

ki hone wale hain hum sab se an-qarib juda