junun mein hum agarche mustaqil KHamosh rahte hain

junūñ meñ ham agarche mustaqil ḳhāmosh rahte haiñ

ḳhirad kī sāzishoñ se bhī magar bā-hosh rahte haiñ

safar jaarī hai sadiyoñ se hamārā nabz-e-ālam meñ

nigāhoñ se zamāne kī magar rū-posh rahte haiñ

hamāre hausloñ ko āzmānā soch kar zālim

qabīle meñ hamāre sab kafan-bar-dosh rahte haiñ

nahīñ pahchāntī jo vaqt miT jaatī haiñ vo qaumeñ

na un meñ hausle baaqī na un meñ josh rahte haiñ

hamārī qaum par taarī hai gahrī niiñd kuchh aisī

ki jaise ḳhvāb meñ Duube hue ḳhargosh rahte haiñ

ġham-e-daurāñ ġham-e-jānāñ ġham-e-hijrāñ ġham-e-yārāñ

ye saare ġham hamesha mujh se ham-āġhosh rahte haiñ

junun mein hum agarche mustaqil KHamosh rahte hain

KHirad ki sazishon se bhi magar ba-hosh rahte hain

safar jari hai sadiyon se hamara nabz-e-alam mein

nigahon se zamane ki magar ru-posh rahte hain

hamare hauslon ko aazmana soch kar zalim

qabile mein hamare sab kafan-bar-dosh rahte hain

nahin pahchanti jo waqt miT jati hain wo qaumen

na un mein hausle baqi na un mein josh rahte hain

hamari qaum par tari hai gahri nind kuchh aisi

ki jaise KHwab mein Dube hue KHargosh rahte hain

gham-e-dauran gham-e-jaanan gham-e-hijran gham-e-yaran

ye sare gham hamesha mujh se ham-aghosh rahte hain