kash maqbul ho dua-e-adu

kaash maqbūl ho duā-e-adū

kyā karūñ vo bhī mustajāb nahīñ

ab to us chashm-e-tar kā charchā hai

zikr-e-dariyā nahīñ sahāb nahīñ

jam.a tūfān-o-chashm-e-tar masraf

ab masārif kā kuchh hisāb nahīñ

dho diyā sab ko dīda-e-tar ne

vo nahīñ dars vo kitāb nahīñ

ishq-bāzī kā muñh chiḌānā hai

aur vo mausam nahīñ shabāb nahīñ

terī āñkhoñ ke daur meñ kyā kyā

sehr rusvā nahīñ ḳharāb nahīñ

muḳhtasar hāl-e-chashm-o-dil ye hai

us ko ārām us ko ḳhvāb nahīñ

jo sarāpā-e-yār 'āzurdā'

tere dīvāñ kā intiḳhāb nahīñ

kash maqbul ho dua-e-adu

kya karun wo bhi mustajab nahin

ab to us chashm-e-tar ka charcha hai

zikr-e-dariya nahin sahab nahin

jama tufan-o-chashm-e-tar masraf

ab masarif ka kuchh hisab nahin

dho diya sab ko dida-e-tar ne

wo nahin dars wo kitab nahin

ishq-bazi ka munh chiDana hai

aur wo mausam nahin shabab nahin

teri aankhon ke daur mein kya kya

sehr ruswa nahin KHarab nahin

muKHtasar haal-e-chashm-o-dil ye hai

us ko aaram us ko KHwab nahin

jo sarapa-e-yar 'azurda'

tere diwan ka intiKHab nahin