kabhi numayan kabhi tah-nashin bhi rahte hain

kabhī numāyāñ kabhī tah-nashīñ bhī rahte haiñ

yahīñ pe rahte haiñ ham aur nahīñ bhī rahte haiñ

bhaTaktī nazroñ meñ haiñ murtakiz nigāheñ bhī

gumāñ-kadoñ meñ kuchh ahl-e-yaqīñ bhī rahte haiñ

agarche ham ko muqaddam hai rāh-e-ḳhidmat-e-ḳhalq

jo baaz aa.e to apne ta.iiñ bhī rahte haiñ

bajā shavāhid o mantiq qubūl bahs o dalīl

pa ham ḳhatā-e-nazar ke qarīñ bhī rahte haiñ

hijāb fikr-o-nazar ke uThā ke dekho to

hamāre fan meñ ka.ī nāznīñ bhī rahte haiñ

shabāhateñ sī ġhubār-e-had-e-nigāh meñ haiñ

pas-e-falak kahīñ ahl-e-zamīñ bhī rahte haiñ

tum apne Thor-Thikānoñ ko yaad rakkho 'sāz'

hamārā kyā hai ki ham to kahīñ bhī rahte haiñ

kabhi numayan kabhi tah-nashin bhi rahte hain

yahin pe rahte hain hum aur nahin bhi rahte hain

bhaTakti nazron mein hain murtakiz nigahen bhi

guman-kadon mein kuchh ahl-e-yaqin bhi rahte hain

agarche hum ko muqaddam hai rah-e-KHidmat-e-KHalq

jo baz aae to apne tain bhi rahte hain

baja shawahid o mantiq qubul bahs o dalil

pa hum KHata-e-nazar ke qarin bhi rahte hain

hijab fikr-o-nazar ke uTha ke dekho to

hamare fan mein kai naznin bhi rahte hain

shabahaten si ghubar-e-had-e-nigah mein hain

pas-e-falak kahin ahl-e-zamin bhi rahte hain

tum apne Thor-Thikanon ko yaad rakkho 'saz'

hamara kya hai ki hum to kahin bhi rahte hain