kahan to pa-e-safar ko rah-e-hayat kam thi

kahīñ to pā-e-safar ko rāh-e-hayāt kam thī

qadam baḌhāyā to sair ko kā.enāt kam thī

sivā.e mere kisī ko jalne kā hosh kab thā

charāġh kī lau buland thī aur raat kam thī

ḳhayāl sahrā-e-zāt meñ us maqām par thā

jahāñ ki gunjā.ish-e-farār-o-najāt kam thī

vo fard-e-baḳhshish ki jis kī takmīl kī hai maiñ ne

nigāh Daalī to is meñ apnī hī zaat kam thī

bahut hañse ḳhuub ro.e jī khol kar jiye ham

agarche mīād-e-hasti-e-be-sabāt kam thī

tire karam se baḌā thā kuchh e'tiqād merā

isī liye mujh ko fikr-e-saum-o-salāt kam thī

bahāo paanī kī buuñd par ḳhuun kā samundar

nahīñ to ik qatra-e-lahū se furāt kam thī

ġhazal 'muzaffar' kī ḳhuub thī is meñ shak nahīñ hai

magar taġhazzul ke naam par ek baat kam thī

kahin to pa-e-safar ko rah-e-hayat kam thi

qadam baDhaya to sair ko kaenat kam thi

siwae mere kisi ko jalne ka hosh kab tha

charagh ki lau buland thi aur raat kam thi

KHayal sahra-e-zat mein us maqam par tha

jahan ki gunjaish-e-farar-o-najat kam thi

wo fard-e-baKHshish ki jis ki takmil ki hai main ne

nigah Dali to is mein apni hi zat kam thi

bahut hanse KHub roe ji khol kar jiye hum

agarche miad-e-hasti-e-be-sabaat kam thi

tere karam se baDa tha kuchh e'tiqad mera

isi liye mujh ko fikr-e-saum-o-salat kam thi

bahao pani ki bund par KHun ka samundar

nahin to ek qatra-e-lahu se furaat kam thi

ghazal 'muzaffar' ki KHub thi is mein shak nahin hai

magar taghazzul ke nam par ek baat kam thi