kaTe din sun kai mausam mahine

kaTe din sun ka.ī mausam mahīne

tujhe jī meñ bahut DhūñDā hai jī ne

chhuā phūloñ ne jhuk kar us kā chehra

bhigo.e hoñT shabnam kī namī ne

abhī barchhī ke phal ruḌkeñ badan meñ

abhī saḌkan bhare ye sar ye siine

paḌheñ rag-ved kī pākīza hamdeñ

piye nirvān jal ke ābgīne

batā.ī raat kī sab baat āḳhir

kahīñ kā bhī nahīñ chhoḌā kisī ne

sakhī aa chāñd kī jānib phlāñge

kaTahre rañg ke kirnoñ ke ziine

judā.ī kā tabhī mafhūm samjhā

lage jab chhūTne dil ke pasīne

ye gaanī le ke aa.eñ us kī mayyā

ye añgūThī mujhe bhejī hai pī ne

sakhī ke daañt motī jagtī jotī

sakhī ke nain tarshīda nagīne

chaTak bosa tane kere meñ ham tum

dikhā.e haa.e kyā manzar murī ne

kaTe din sun kai mausam mahine

tujhe ji mein bahut DhunDa hai ji ne

chhua phulon ne jhuk kar us ka chehra

bhigoe honT shabnam ki nami ne

abhi barchhi ke phal ruDken badan mein

abhi saDkan bhare ye sar ye sine

paDhen rag-wed ki pakiza hamden

piye nirwan jal ke aabgine

batai raat ki sab baat aaKHir

kahin ka bhi nahin chhoDa kisi ne

sakhi aa chand ki jaanib phlange

kaTahre rang ke kirnon ke zine

judai ka tabhi mafhum samjha

lage jab chhuTne dil ke pasine

ye gani le ke aaen us ki mayya

ye anguThi mujhe bheji hai pi ne

sakhi ke dant moti jagti joti

sakhi ke nain tarshida nagine

chaTak bosa tane kere mein hum tum

dikhae hae kya manzar muri ne