khaDi hai sham ki KHwab-e-safar ruka hua hai

khaḌī hai shaam ki ḳhvāb-e-safar rukā huā hai

yaqīn kyuuñ nahīñ aatā agar rukā huā hai

guzarne vaale the jo bhī guzar ga.e lekin

miyān-e-rāh koī be-ḳhabar rukā huā hai

baras rahā hai na chhaTtā hai ye ka.ī din se

jo ek abr mirī ḳhaak par rukā huā hai

ravāñ bhī silsial-e-ashk hai abhī kuchh kuchh

ye qāfila jo kahīñ besh-tar rukā huā hai

abhī nikal nahīñ saktā gharoñ se koī yahāñ

ki sail-e-āb abhī dar-ba-dar rukā huā hai

har ek shai hai kisī raakh meñ badalne ko

kahīñ jo ḳhāna-e-ḳhas meñ sharar rukā huā hai

chalī huī thī mirī baat jitne zoroñ se

usī hisāb se is kā asar rukā huā hai

pahuñch sake kisī manzil pe kyā musāfir-e-dil

ki chal rahā hai ba-zāhir magar rukā huā hai

ye harf o saut karishme haiñ sab usī ke 'zafar'

lahū ke saath ragoñ meñ jo Dar rukā huā hai

khaDi hai sham ki KHwab-e-safar ruka hua hai

yaqin kyun nahin aata agar ruka hua hai

guzarne wale the jo bhi guzar gae lekin

miyan-e-rah koi be-KHabar ruka hua hai

baras raha hai na chhaTta hai ye kai din se

jo ek abr meri KHak par ruka hua hai

rawan bhi silsial-e-ashk hai abhi kuchh kuchh

ye qafila jo kahin besh-tar ruka hua hai

abhi nikal nahin sakta gharon se koi yahan

ki sail-e-ab abhi dar-ba-dar ruka hua hai

har ek shai hai kisi rakh mein badalne ko

kahin jo KHana-e-KHas mein sharar ruka hua hai

chali hui thi meri baat jitne zoron se

usi hisab se is ka asar ruka hua hai

pahunch sake kisi manzil pe kya musafir-e-dil

ki chal raha hai ba-zahir magar ruka hua hai

ye harf o saut karishme hain sab usi ke 'zafar'

lahu ke sath ragon mein jo Dar ruka hua hai