KHair se zist ka ai kash ho anjam abhi

ḳhair se ziist kā ai kaash ho anjām abhī

vaqt achchhā hai zabāñ par hai tirā naam abhī

haañ labālab to hai labrez nahīñ jaam abhī

zabt meñ hai asar-e-gardish-e-ayyām abhī

vo nahīñ haiñ to nigāhoñ meñ hai duniyā andher

kaise raushan the munavvar the dar-o-bām abhī

yahī samjheñge mohabbat ko hayāt-e-jāved

jo samajhte haiñ use maut kā paiġhām abhī

be-niyāzī-e-tamanna ki hai ik jannat-e-ishq

dil ne paayā nahīñ fitrat se ye in.aam abhī

tā-ba-me.arāj-e-yaqīñ dekhiye kab tak pahuñchūñ

dil kī gahrā.iyoñ meñ haiñ bahut auhām abhī

āzim-e-bārgah-e-dost thā 'mānī' lekin

kyā pahuñchtā ki hai sar bar-dar-e-asnām abhī

KHair se zist ka ai kash ho anjam abhi

waqt achchha hai zaban par hai tera nam abhi

han labaalab to hai labrez nahin jam abhi

zabt mein hai asar-e-gardish-e-ayyam abhi

wo nahin hain to nigahon mein hai duniya andher

kaise raushan the munawwar the dar-o-baam abhi

yahi samjhenge mohabbat ko hayat-e-jawed

jo samajhte hain use maut ka paigham abhi

be-niyazi-e-tamanna ki hai ek jannat-e-ishq

dil ne paya nahin fitrat se ye inam abhi

ta-ba-mearaj-e-yaqin dekhiye kab tak pahunchun

dil ki gahraiyon mein hain bahut auham abhi

aazim-e-bargah-e-dost tha 'mani' lekin

kya pahunchta ki hai sar bar-dar-e-asnam abhi