KHizan mili abhi tak kahin bahaar mile

ḳhizāñ milī abhī tak kahīñ bahār mile

safar meñ pyaar kā mausam to bā-vaqār mile

maiñ aise dar kā gadā huuñ jahāñ pe motī kyā

hazār baar mujhe sang āb-dār mile

ḳhushī kā nuur to ik-bārgī milā hai tumheñ

hameñ to ġham ke añdhere bhī qist-vār mile

tirī chamak kā taqāzā nahīñ zarūrat hai

tire ḳhamīr meñ thoḌā sā inkisār mile

ye aarzū hai ki ab raushnī ke qisse haiñ

mire charāġh ko sūraj kā e’tibār mile

maiñ ḳhush-nasīb bahut huuñ ki mujh ko duniyā meñ

qadam qadam pe mohabbat ke shāhkār mile

maiñ āsmānoñ zamīnoñ kī had milā dūñgā

jo chār-roz kā sach-much meñ iḳhtiyār mile

KHizan mili abhi tak kahin bahaar mile

safar mein pyar ka mausam to ba-waqar mile

main aise dar ka gada hun jahan pe moti kya

hazar bar mujhe sang aab-dar mile

KHushi ka nur to ik-bargi mila hai tumhein

hamein to gham ke andhere bhi qist-war mile

teri chamak ka taqaza nahin zarurat hai

tere KHamir mein thoDa sa inkisar mile

ye aarzu hai ki ab raushni ke qisse hain

mere charagh ko suraj ka e’tibar mile

main KHush-nasib bahut hun ki mujh ko duniya mein

qadam qadam pe mohabbat ke shahkar mile

main aasmanon zaminon ki had mila dunga

jo chaar-roz ka sach-much mein iKHtiyar mile