خلوص چہروں سے ہے نمایاں تو پھر نظر بد گمان کیوں ہے

خلوص چہروں سے ہے نمایاں تو پھر نظر بد گمان کیوں ہے

بتا کہ بیگانگی کا عالم مرے ترے درمیان کیوں ہے

یہاں وفا کی نہ قدر و قیمت نہ آشنائے وفا ہے کوئی

مجھے وفا کا صلہ ملے گا یہ میرے دل میں گمان کیوں ہے

کبھی نہ میں اس طرف سے گزرا نہ میرا دست طلب ہی پھیلا

تو پھر یہ راہ طلب میں آخر مرے قدم کا نشان کیوں ہے

ہر ایک در پر جبیں جھکانا تجھے مبارک مگر یہ سن لے

جو تجھ میں خودداریاں نہیں ہیں تو عشق کی آن بان کیوں ہے

بہت دنوں میں اماں ملی ہے خود اپنے سائے میں آ کے مجھ کو

یہ سوچتا ہوں کہ گھر کے باہر کسی طرف سائبان کیوں ہے

نہ ان کا جلوہ نہ ان کی یادیں نہ ان کا چہرہ نہ ان کا پرتو

دماغ رہ رہ کے پوچھتا ہے مکیں نہیں تو مکان کیوں ہے

کوئی تو اس میں فریب ہوگا جسے ضیاؔ میں سمجھ نہ پایا

نہ جانے کب سے یہ سوچتا ہوں وہ اس قدر مہربان کیوں ہے