kisht-e-ehsas mein thoDa sa mila lenge tujhe

kisht-e-ehsās meñ thoḌā sā milā leñge tujhe

phir na.ī paud kī sūrat meñ ugā leñge tujhe

kyā ḳhabar kaam kā lamha koī haath aa jaa.e

kāsa-e-vaqt kisī roz khañgāleñge tujhe

ik faqat terī tavajjoh se tire pyaar talak

rafta rafta hī sahī apnā banā leñge tujhe

sarhad-e-vaqt ke us paar tū jaane de mujhe

ai ġham-e-yār! vahāñ par bhī bulā leñge tujhe

na machā shor umañDte hue dariyā mere

varna ifrīt samundar ke ye khā leñge tujhe

zindagī ham se tirī āñkh-micholī kab tak

ik na ik roz kisī moḌ pe aa leñge tujhe

kaam aa hī ga.ī 'sārim' tirī āshufta-sarī

qāfile ishq ke ab rāh-numā leñge tujhe

kisht-e-ehsas mein thoDa sa mila lenge tujhe

phir nai paud ki surat mein uga lenge tujhe

kya KHabar kaam ka lamha koi hath aa jae

kasa-e-waqt kisi roz khangalenge tujhe

ek faqat teri tawajjoh se tere pyar talak

rafta rafta hi sahi apna bana lenge tujhe

sarhad-e-waqt ke us par tu jaane de mujhe

ai gham-e-yar! wahan par bhi bula lenge tujhe

na macha shor umanDte hue dariya mere

warna ifrit samundar ke ye kha lenge tujhe

zindagi hum se teri aankh-micholi kab tak

ek na ek roz kisi moD pe aa lenge tujhe

kaam aa hi gai 'sarim' teri aashufta-sari

qafile ishq ke ab rah-numa lenge tujhe