kisi ranjish ko hawa do ki main zinda hun abhi

kisī ranjish ko havā do ki maiñ zinda huuñ abhī

mujh ko ehsās dilā do ki maiñ zinda huuñ abhī

mere rukte hī mirī sāñseñ bhī ruk jā.eñgī

fāsle aur baḌhā do ki maiñ zinda huuñ abhī

zahr piine kī to aadat thī zamāne vaalo

ab koī aur davā do ki maiñ zinda huuñ abhī

chaltī rāhoñ meñ yūñhī aañkh lagī hai 'fākir'

bhiiḌ logoñ kī haTā do ki maiñ zinda huuñ abhī

kisi ranjish ko hawa do ki main zinda hun abhi

mujh ko ehsas dila do ki main zinda hun abhi

mere rukte hi meri sansen bhi ruk jaengi

fasle aur baDha do ki main zinda hun abhi

zahr pine ki to aadat thi zamane walo

ab koi aur dawa do ki main zinda hun abhi

chalti rahon mein yunhi aankh lagi hai 'fakir'

bhiD logon ki haTa do ki main zinda hun abhi