koi bijli in KHarabon mein ghaTa raushan kare

koī bijlī in ḳharāboñ meñ ghaTā raushan kare

ai añdherī bastiyo tum ko ḳhudā raushan kare

nanhe hoñToñ par khileñ māsūm lafzoñ ke gulāb

aur māthe par koī harf-e-duā raushan kare

zard chehroñ par bhī chamke surḳh jazboñ kī dhanak

sāñvle hāthoñ ko bhī rañg-e-hinā raushan kare

ek laḌkā shahr kī raunaq meñ sab kuchh bhuul jaa.e

ek buḌhiyā roz chaukhaT par diyā raushan kare

ḳhair agar tum se na jal paa.eñ vafāoñ ke charāġh

tum bujhānā mat jo koī dūsrā raushan kare

aag jaltī chhoḌ aa.e ho to ab kyā fikr hai

jaane kitne shahr ye pāgal havā raushan kare

dil hī fānūs-e-havā dil hī ḳhas-o-ḳhār-e-havas

dekhnā ye hai ki us kā qurb kyā raushan kare

yā to is jangal meñ nikle chāñd tere naam kā

yā mirā hī lafz merā rāstā raushan kare

koi bijli in KHarabon mein ghaTa raushan kare

ai andheri bastiyo tum ko KHuda raushan kare

nanhe honTon par khilen masum lafzon ke gulab

aur mathe par koi harf-e-dua raushan kare

zard chehron par bhi chamke surKH jazbon ki dhanak

sanwle hathon ko bhi rang-e-hina raushan kare

ek laDka shahr ki raunaq mein sab kuchh bhul jae

ek buDhiya roz chaukhaT par diya raushan kare

KHair agar tum se na jal paen wafaon ke charagh

tum bujhana mat jo koi dusra raushan kare

aag jalti chhoD aae ho to ab kya fikr hai

jaane kitne shahr ye pagal hawa raushan kare

dil hi fanus-e-hawa dil hi KHas-o-KHar-e-hawas

dekhna ye hai ki us ka qurb kya raushan kare

ya to is jangal mein nikle chand tere nam ka

ya mera hi lafz mera rasta raushan kare