کوئی نہیں ہے رشک مسیحا کہیں جسے

کوئی نہیں ہے رشک مسیحا کہیں جسے

لیکن ہے دید یار مداوا کہیں جسے

کیجے ضرور ذکر مرا جا بجا مگر

ایسا نہ ہو وہ ذکر کہ شکوہ کہیں جسے

گیسوئے یار رخ پہ گھٹا بن کے چھا گئے

یہ تیرگی ہے یا شب یلدا کہیں جسے

ان کی نظر بدلتے ہی دنیا بدل گئی

سحر نظر کہیں یا کرشمہ کہیں جسے

تم کیا گئے کہ دل بھی گیا جان بھی گئی

یہ ہے دل اور جان یہ قبضہ کہیں جسے

کرنا ہے کام کیجے وہی اس جہان میں

اپنے تو اپنے غیر بھی اچھا کہیں جسے

اب اس کو بھی مہارت فن کا غرور ہے

دنیائے فن کا کاغذ سادہ کہیں جسے

صحرا نورد آج بھی ہے دیکھیے حضور

خاکیؔ کہیں یا آپ کا شیدا کہیں جسے