kuchh aisa pas-e-ghairat uTh gaya is ahd-e-pur-fan mein

kuchh aisā pās-e-ġhairat uTh gayā is ahd-e-pur-fan meñ

ki zevar ho gayā tauq-e-ġhulāmī apnī gardan meñ

shajar sakte meñ haiñ ḳhāmosh haiñ bulbul nasheman meñ

sidhārā qāfila phūloñ kā sannāTā hai gulshan meñ

garāñ thī dhuup aur shabnam bhī jin paudoñ ko gulshan meñ

tirī qudrat se vo phūle-phale sahrā ke dāman meñ

havā-e-tāza dil ko ḳhud-baḳhud bechain kartī hai

qafas meñ kah gayā koī bahār aa.ī hai gulshan meñ

miTānā thā use bhī jazba-e-shauq-e-fanā tujh ko

nishān-e-qabr-e-majnūñ daaġh hai sahrā ke dāman meñ

zamāna meñ nahīñ ahl-e-hunar kā qadr-dāñ baaqī

nahīñ to saikḌoñ motī haiñ is dariyā ke dāman meñ

yahāñ tasbīh kā halqa vahāñ zunnār kā phandā

asīrī lāzmī hai maz.hab-e-shaiḳh-o-brahman meñ

jinheñ sīñchā thā ḳhūn-e-dil se agle bāġhbānoñ ne

taraste ab haiñ paanī ko vo paude mere gulshan meñ

dikhāyā mo'jiza husn-e-bashar kā dast-e-qudrat ne

bharī tāsīr tasvīr-e-gilī ke rañg-o-roġhan meñ

shahīd-e-yās huuñ rusvā huuñ nākāmī ke hāthoñ se

jigar kā chaak baḌh kar aa gayā hai mere dāman meñ

jahāñ meñ rah ke yuuñ qaa.em huuñ apnī be-sabātī par

ki jaise aks-e-gul rahtā hai āb-e-jū-e-gulshan meñ

sharāb-e-husn ko kuchh aur hī tāsīr detā hai

javānī ke numū se be-ḳhabar honā laḌakpan meñ

shabāb aayā hai paidā rang hai ruḳhsār-e-nāzuk se

faroġh-e-husn kahtā hai sahar hotī hai gulshan meñ

nahīñ hotā hai muhtāj-e-numā.ish faiz shabnam kā

añdherī raat meñ motī luTā jaatī hai gulshan meñ

matā-e-dard-e-dil ik daulat-e-bedār hai mujh ko

dur-e-shahvār haiñ ashk-e-mohabbat mere dāman meñ

na batlā.ī kisī ne bhī haqīqat rāz-e-hastī kī

butoñ se jā ke sar phoḌā bahut dair-e-brahman meñ

purānī kāvisheñ dair-o-haram kī miTtī jaatī hai

na.ī tahzīb ke jhagḌe haiñ ab shaiḳh-o-barahman meñ

uḌā kar le ga.ī bād-e-ḳhizāñ is saal us ko bhī

rahā thā ek barg-e-zard baaqī mere gulshan meñ

vatan kī ḳhaak se mar kar bhī ham ko uns baaqī hai

mazā dāmān-e-mādar kā hai is miTTī ke dāman meñ

kuchh aisa pas-e-ghairat uTh gaya is ahd-e-pur-fan mein

ki zewar ho gaya tauq-e-ghulami apni gardan mein

shajar sakte mein hain KHamosh hain bulbul nasheman mein

sidhaara qafila phulon ka sannaTa hai gulshan mein

garan thi dhup aur shabnam bhi jin paudon ko gulshan mein

teri qudrat se wo phule-phale sahra ke daman mein

hawa-e-taza dil ko KHud-baKHud bechain karti hai

qafas mein kah gaya koi bahaar aai hai gulshan mein

miTana tha use bhi jazba-e-shauq-e-fana tujh ko

nishan-e-qabr-e-majnun dagh hai sahra ke daman mein

zamana mein nahin ahl-e-hunar ka qadr-dan baqi

nahin to saikDon moti hain is dariya ke daman mein

yahan tasbih ka halqa wahan zunnar ka phanda

asiri lazmi hai mazhab-e-shaiKH-o-brahman mein

jinhen sincha tha KHun-e-dil se agle baghbanon ne

taraste ab hain pani ko wo paude mere gulshan mein

dikhaya mo'jiza husn-e-bashar ka dast-e-qudrat ne

bhari tasir taswir-e-gili ke rang-o-roghan mein

shahid-e-yas hun ruswa hun nakaami ke hathon se

jigar ka chaak baDh kar aa gaya hai mere daman mein

jahan mein rah ke yun qaem hun apni be-sabaati par

ki jaise aks-e-gul rahta hai aab-e-ju-e-gulshan mein

sharab-e-husn ko kuchh aur hi tasir deta hai

jawani ke numu se be-KHabar hona laDakpan mein

shabab aaya hai paida rang hai ruKHsar-e-nazuk se

farogh-e-husn kahta hai sahar hoti hai gulshan mein

nahin hota hai muhtaj-e-numaish faiz shabnam ka

andheri raat mein moti luTa jati hai gulshan mein

mata-e-dard-e-dil ek daulat-e-bedar hai mujh ko

dur-e-shahwar hain ashk-e-mohabbat mere daman mein

na batlai kisi ne bhi haqiqat raaz-e-hasti ki

buton se ja ke sar phoDa bahut dair-e-brahman mein

purani kawishen dair-o-haram ki miTti jati hai

nai tahzib ke jhagDe hain ab shaiKH-o-barahman mein

uDa kar le gai baad-e-KHizan is sal us ko bhi

raha tha ek barg-e-zard baqi mere gulshan mein

watan ki KHak se mar kar bhi hum ko uns baqi hai

maza daman-e-madar ka hai is miTTi ke daman mein