kya bhala mujhko parakhne ka natija nikla

kyā bhalā mujh ko parakhne kā natīja niklā

zaḳhm-e-dil aap kī nazroñ se bhī gahrā niklā

tishnagī jam ga.ī patthar kī tarah hoñToñ par

Duub kar bhī tire dariyā se maiñ pyāsā niklā

jab kabhī tujh ko pukārā mirī tanhā.ī ne

bū uḌī phuul se tasvīr se saayā niklā

koī miltā hai to ab apnā pata pūchhtā huuñ

maiñ tirī khoj meñ tujh se bhī pare jā niklā

mujh se chhuptā hī rahā tū mujhe āñkheñ de kar

maiñ hī parda thā uThā maiñ to tamāshā niklā

toḌ kar dekh liyā ā.īna-e-dil tū ne

terī sūrat ke sivā aur batā kyā niklā

nazar aayā thā sar-e-bām 'muzaffar' koī

pahuñchā dīvār ke nazdīk to saayā niklā

kya bhala mujh ko parakhne ka natija nikla

zaKHm-e-dil aap ki nazron se bhi gahra nikla

tishnagi jam gai patthar ki tarah honTon par

Dub kar bhi tere dariya se main pyasa nikla

jab kabhi tujh ko pukara meri tanhai ne

bu uDi phul se taswir se saya nikla

koi milta hai to ab apna pata puchhta hun

main teri khoj mein tujh se bhi pare ja nikla

mujh se chhupta hi raha tu mujhe aankhen de kar

main hi parda tha uTha main to tamasha nikla

toD kar dekh liya aaina-e-dil tu ne

teri surat ke siwa aur bata kya nikla

nazar aaya tha sar-e-baam 'muzaffar' koi

pahuncha diwar ke nazdik to saya nikla