lagae baiThe hain mehndi jo mere KHun se poron mein

lagā.e baiThe haiñ mehñdī jo mere ḳhuuñ se poroñ meñ

yahī to rahzanoñ meñ haiñ yahī haiñ dil ke choroñ meñ

paḌe rahte haiñ aksar sū-e-mushkīñ rū-e-jānāñ par

bahut dekhā hai ham ne ittifāq in kaale goroñ meñ

lagā.ī aag un ke husn-e-ālam-soz ne har-sū

jalāne chau-lakhā baiThe haiñ yuuñ kore sakoroñ meñ

vufūr-e-sohbat-e-aġhyār se kuchh aise khul khele

na vo jheñpeñ hazāroñ meñ na sharmā.eñ karo.roñ meñ

hameñ kū-e-butāñ se do-qadam uThne nahīñ detī

hamārī nā-tavānī in dinoñ hai aise zoroñ meñ

amaañ detā nahīñ vo chāhne vāloñ ko mar kar bhī

hamāre naam ko zālim ne piTvāyā DhinDhoroñ meñ

mire nāloñ kā 'āshiq' rañg uḌāyā andalīboñ ne

ḳhirām-e-yār kī shohrat huī saare chakoroñ meñ

lagae baiThe hain mehndi jo mere KHun se poron mein

yahi to rahzanon mein hain yahi hain dil ke choron mein

paDe rahte hain aksar su-e-mushkin ru-e-jaanan par

bahut dekha hai hum ne ittifaq in kale goron mein

lagai aag un ke husn-e-alam-soz ne har-su

jalane chau-lakha baiThe hain yun kore sakoron mein

wufur-e-sohbat-e-aghyar se kuchh aise khul khele

na wo jhenpen hazaron mein na sharmaen karoron mein

hamein ku-e-butan se do-qadam uThne nahin deti

hamari na-tawani in dinon hai aise zoron mein

aman deta nahin wo chahne walon ko mar kar bhi

hamare nam ko zalim ne piTwaya DhinDhoron mein

mere nalon ka 'ashiq' rang uDaya andalibon ne

KHiram-e-yar ki shohrat hui sare chakoron mein