lutf ye hai jise aashob-e-jahan kahta hun

lutf ye hai jise āshob-e-jahāñ kahtā huuñ

usī zālim ko faroġh-e-dil-o-jāñ kahtā huuñ

ġhair kā zikr hī kyā muft meñ ilzām na do

dil kī har baat maiñ tum se bhī kahāñ kahtā huuñ

kisī majbūr ke hoñToñ pe jo aa jaatā hai

us tabassum ko maiñ e.ajāz-e-fuġhāñ kahtā huuñ

na maiñ zindānī-e-sahrā na asīr-e-gulshan

koī bandish ho use jī kā ziyāñ kahtā huuñ

dil shikasta sahī māyūs nahīñ huuñ ai dost

maiñ ki har daur ko daur-e-guzarāñ kahtā huuñ

husn kā sheva-e-paimāñ-shikanī achchhā hai

phir bhī har saañs ko chashm-e-nigarāñ kahtā huuñ

koī had hai mirī āshufta-sarī kī 'tābāñ'

un kī zulfoñ ko charāġhoñ kā dhuāñ kahtā huuñ

lutf ye hai jise aashob-e-jahan kahta hun

usi zalim ko farogh-e-dil-o-jaan kahta hun

ghair ka zikr hi kya muft mein ilzam na do

dil ki har baat main tum se bhi kahan kahta hun

kisi majbur ke honTon pe jo aa jata hai

us tabassum ko main eajaz-e-fughan kahta hun

na main zindani-e-sahra na asir-e-gulshan

koi bandish ho use ji ka ziyan kahta hun

dil shikasta sahi mayus nahin hun ai dost

main ki har daur ko daur-e-guzaran kahta hun

husn ka shewa-e-paiman-shikani achchha hai

phir bhi har sans ko chashm-e-nigaran kahta hun

koi had hai meri aashufta-sari ki 'taban'

un ki zulfon ko charaghon ka dhuan kahta hun