masum nazar ka bhola-pan lalcha ke lubhana kya jaane

ma.asūm nazar kā bholā-pan lalchā ke lubhānā kyā jaane

dil aap nishāna bantā hai vo tiir chalānā kyā jaane

kah jaatī hai kyā vo chīn-e-jabīñ ye aaj samajh sakte haiñ kahīñ

kuchh sīkhā huā to kaam nahīñ dil naaz uThānā kyā jaane

chaTkī jo kalī koyal kuukī ulfat kī kahānī ḳhatm huī

kyā kis ne kahī kyā kis ne sunī ye batā zamāna kyā jaane

thā dair-o-haram meñ kyā rakhā jis samt gayā Takrā ke phirā

kis parde ke pīchhe hai sho.ala andhā parvāna kyā jaane

ye zorā-zorī ishq kī thī fitrat hī jis ne badal Daalī

jaltā huā dil ho kar paanī aañsū ban jaanā kyā jaane

sajdoñ se paḌā patthar meñ gaḌhā lekin na miTā māthe kā likhā

karne ko ġharīb ne kyā na kiyā taqdīr banānā kyā jaane

āñkhoñ kī andhī ḳhud-ġharzī kaahe ko samajhne degī kabhī

jo niiñd uḌā de rātoñ kī vo ḳhvāb meñ aanā kyā jaane

patthar kī lakīr hai naqsh-e-vafā ā.īna na jaano talvoñ kā

lahrāyā kare rañgīñ-sho.ala dil palTe khānā kyā jaane

jis naale se duniyā bekal hai vo jalte dil kī mash.al hai

jo pahlā luukā ḳhud na sahe vo aag lagānā kyā jaane

ham 'ārzū' aa.e baiThe haiñ aur vo sharmā.e baiThe haiñ

mushtāq-nazar gustāḳh nahīñ parda sarkānā kyā jaane

masum nazar ka bhola-pan lalcha ke lubhana kya jaane

dil aap nishana banta hai wo tir chalana kya jaane

kah jati hai kya wo chin-e-jabin ye aaj samajh sakte hain kahin

kuchh sikha hua to kaam nahin dil naz uThana kya jaane

chaTki jo kali koyal kuki ulfat ki kahani KHatm hui

kya kis ne kahi kya kis ne suni ye bata zamana kya jaane

tha dair-o-haram mein kya rakha jis samt gaya Takra ke phira

kis parde ke pichhe hai shoala andha parwana kya jaane

ye zora-zori ishq ki thi fitrat hi jis ne badal Dali

jalta hua dil ho kar pani aansu ban jaana kya jaane

sajdon se paDa patthar mein gaDha lekin na miTa mathe ka likha

karne ko gharib ne kya na kiya taqdir banana kya jaane

aankhon ki andhi KHud-gharzi kahe ko samajhne degi kabhi

jo nind uDa de raaton ki wo KHwab mein aana kya jaane

patthar ki lakir hai naqsh-e-wafa aaina na jaano talwon ka

lahraya kare rangin-shoala dil palTe khana kya jaane

jis nale se duniya bekal hai wo jalte dil ki mashal hai

jo pahla luka KHud na sahe wo aag lagana kya jaane

hum 'arzu' aae baiThe hain aur wo sharmae baiThe hain

mushtaq-nazar gustaKH nahin parda sarkana kya jaane