maine ek aawaz suni thi kamre mein KHamoshi ki

maiñ ne ik āvāz sunī thī kamre meñ ḳhāmoshī kī

mere kaan meñ aa kar terī yādoñ ne sargoshī kī

kuchh to ghar kā rasta maiñ bhī apnī dhun meñ bhuul gayā

aur nashīlī āñkhoñ ne bhī taarī kuchh mad.hoshī kī

ham ne phūloñ se misroñ ko ḳhūn-e-dil se yuuñ sīñchā

saarī umr hī ḳhushbū bāñTī ham ne itr-faroshī kī

apnoñ ne rāzoñ kī gaThḌī biich chaurāhe meñ rakh dī

logoñ ne to baat uchhālī rab ne parda-poshī kī

kitne hī an-dekhe manzar mujh se bāteñ karte haiñ

jab bhī ġhazleñ paḌhtā huuñ maiñ 'sāġhar' 'mohsin' 'doshī' kī

ham ne sochā aur dhueñ ne ḳhadd-o-ḳhāl banā Daale

ham ne terā hijr manāyā khul kar cigarette-noshī kī

ḳhvāboñ kī duniyā se 'āsif' ab to bāhar aa jaao

taptā sūraj sar par hai aur bāteñ rākā-poshī kī

main ne ek aawaz suni thi kamre mein KHamoshi ki

mere kan mein aa kar teri yaadon ne sargoshi ki

kuchh to ghar ka rasta main bhi apni dhun mein bhul gaya

aur nashili aankhon ne bhi tari kuchh madhoshi ki

hum ne phulon se misron ko KHun-e-dil se yun sincha

sari umr hi KHushbu banTi hum ne itr-faroshi ki

apnon ne raazon ki gaThDi bich chaurahe mein rakh di

logon ne to baat uchhaali rab ne parda-poshi ki

kitne hi an-dekhe manzar mujh se baaten karte hain

jab bhi ghazlen paDhta hun main 'saghar' 'mohsin' 'doshi' ki

hum ne socha aur dhuen ne KHadd-o-KHal bana Dale

hum ne tera hijr manaya khul kar cigarette-noshi ki

KHwabon ki duniya se 'asif' ab to bahar aa jao

tapta suraj sar par hai aur baaten raka-poshi ki