main tere gham mein ab nahin nashad

maiñ tire ġham meñ ab nahīñ nāshād

de mirī jaañ mujhe mubārakbād

mere dushman na mujh ko bhuul sake

varna rakhtā hai kaun kis ko yaad

zindagī ko samajh ke zinda raho

zindagī varna kār-e-be-buniyād

phir ḳhudā.ī bhī chāhe kar lenā

pahle sar kar le bandagī kā jihād

haiñ sabhī aadmī to phir ye kyoñ

aadmī ko hai aadmī se 'inād

'ishq aur zindagī kī māñge bhiik

koī aisī hī paḌ ga.ī uftād

ham zamāne se sulh to kar leñ

aur na jaa.e jo is kī ḳhū-e-fasād

aur kyā deñ ḳhirāj-e-kisht-e-umīd

fasl kī fasl ho ga.ī barbād

kyoñ 'adū se kareñ salām-o-payām

āsmāñ tujh se nāla-o-fariyād

hāsil-e-‘umr kyā hai tanhā.ī

kyā chaman kaisā ḳhāna-e-sayyād

aan pahuñche yahāñ bhī farzāne

mai-kada phir na ho sakā ābād

main tere gham mein ab nahin nashad

de meri jaan mujhe mubarakbaad

mere dushman na mujh ko bhul sake

warna rakhta hai kaun kis ko yaad

zindagi ko samajh ke zinda raho

zindagi warna kar-e-be-buniyaad

phir KHudai bhi chahe kar lena

pahle sar kar le bandagi ka jihad

hain sabhi aadmi to phir ye kyon

aadmi ko hai aadmi se 'inad

'ishq aur zindagi ki mange bhik

koi aisi hi paD gai uftad

hum zamane se sulh to kar len

aur na jae jo is ki KHu-e-fasad

aur kya den KHiraj-e-kisht-e-umid

fasl ki fasl ho gai barbaad

kyon 'adu se karen salam-o-payam

aasman tujh se nala-o-fariyaad

hasil-e-‘umr kya hai tanhai

kya chaman kaisa KHana-e-sayyaad

aan pahunche yahan bhi farzane

mai-kada phir na ho saka aabaad