majbur hain par itne to majbur bhi nahin

majbūr haiñ par itne to majbūr bhī nahīñ

jab un ko bhuul jaa.eñ vo din duur bhī nahīñ

kuchh to likhī haiñ apne muqaddar meñ gardisheñ

kuchh pyaar meñ nibāh kā dastūr bhī nahīñ

maiñ ne sunā hai tark-e-ta.alluq ke ba.ad se

afsurda gar nahīñ to vo masrūr bhī nahīñ

dekhī haiñ maiñ ne aisī bhī dukhiyā suhāganeñ

byāhī haiñ aur maañg meñ sindūr bhī nahīñ

ye jis kā zahr ruuh meñ merī utar gayā

halkā sā ghaav thā koī nāsūr bhī nahīñ

us kī nazar se kyuuñ kabhī guzre mirī ġhazal

aisī to ḳhaas maiñ koī mash.hūr bhī nahīñ

majbur hain par itne to majbur bhi nahin

jab un ko bhul jaen wo din dur bhi nahin

kuchh to likhi hain apne muqaddar mein gardishen

kuchh pyar mein nibah ka dastur bhi nahin

main ne suna hai tark-e-talluq ke baad se

afsurda gar nahin to wo masrur bhi nahin

dekhi hain main ne aisi bhi dukhiya suhaganen

byahi hain aur mang mein sindur bhi nahin

ye jis ka zahr ruh mein meri utar gaya

halka sa ghaw tha koi nasur bhi nahin

us ki nazar se kyun kabhi guzre meri ghazal

aisi to KHas main koi mashhur bhi nahin