mashhur hain dilon ki mere be-qarariyan

mash.hūr haiñ diloñ kī mire be-qarāriyāñ

jaatī haiñ lā-makāñ ko dil-e-shab kī zāriyāñ

chehre pe jaise zaḳhm hai nāḳhūn kā ḳharāsh

ab dīdanī huī haiñ mirī dast-kāriyāñ

sau baar ham ne gul ke kahe par chaman ke biich

bhar dī haiñ āb-e-chashm se rātoñ ko kyāriyāñ

kushte kī us ke ḳhaak bharī jism-e-zār par

ḳhālī nahīñ haiñ lutf se lohū kī dhāriyāñ

turbat se 'āshiqoñ ke na uThā kabhū ġhubār

jī se ga.e vale na ga.iiñ rāz-dāriyāñ

ab kis kis apnī ḳhvāhish-e-murda ko roiye

thiiñ ham ko is se saiñkaḌoñ ummīdvāriyāñ

paḌhte phireñge galiyoñ meñ in reḳhtoñ ko log

muddat raheñgī yaad ye bāteñ hamāriyāñ

kyā jānte the aise din aa jā.eñge shitāb

rote guzartiyāñ haiñ hameñ rāteñ sāriyāñ

gul ne hazār rang-e-suḳhan sar kiyā vale

dil se ga.iiñ na bāteñ tirī pyārī pyāriyāñ

jāoge bhuul 'ahd ko farhād-o-qais ke

gar pahuñchīñ ham shikasta-diloñ kī bhī bāriyāñ

bach jaatā ek raat jo kaT jaatī aur 'mīr'

kāTīñ thiiñ kohkan ne bahut rāteñ bhāriyāñ

mashhur hain dilon ki mere be-qarariyan

jati hain la-makan ko dil-e-shab ki zariyan

chehre pe jaise zaKHm hai naKHun ka KHarash

ab didani hui hain meri dast-kariyan

sau bar hum ne gul ke kahe par chaman ke bich

bhar di hain aab-e-chashm se raaton ko kyariyan

kushte ki us ke KHak bhari jism-e-zar par

KHali nahin hain lutf se lohu ki dhaariyan

turbat se 'ashiqon ke na uTha kabhu ghubar

ji se gae wale na gain raaz-dariyan

ab kis kis apni KHwahish-e-murda ko roiye

thin hum ko is se sainkaDon ummidwariyan

paDhte phirenge galiyon mein in reKHton ko log

muddat rahengi yaad ye baaten hamariyan

kya jaante the aise din aa jaenge shitab

rote guzartiyan hain hamein raaten sariyan

gul ne hazar rang-e-suKHan sar kiya wale

dil se gain na baaten teri pyari pyariyan

jaoge bhul 'ahd ko farhad-o-qais ke

gar pahunchin hum shikasta-dilon ki bhi bariyan

bach jata ek raat jo kaT jati aur 'mir'

kaTin thin kohkan ne bahut raaten bhaariyan