mere armanon ko pamal-e-ziyan rahne bhi de
mere armānoñ ko pāmāl-e-ziyāñ rahne bhī de
shauq-e-manzil ko sharīk-e-kārvāñ rahne bhī de
va.ada-o-paimān-e-ulfat ko na de lafzoñ kā rañg
dard se labrez nāloñ ko javāñ rahne bhī de
dekh mujh ko hasrat-ālūda nigāhoñ se na dekh
ye fusūñ ye shoḳh andāz-e-bayāñ rahne bhī de
hā.il-e-ulfat agar hai zindagī kī kashmakash
zindagī kī kashmakash ko darmiyāñ rahne bhī de
maiñ jahāñ huuñ jis tarah huuñ ḳhuub huuñ dil-shād huuñ
hāsil-e-ulfat haiñ ye barbādiyāñ rahne bhī de
vo guzishta aish-o-ishrat vo nashāt-e-zindagī
ḳhvāb thā is ḳhvāb kī rañgīniyāñ rahne bhī de
dost majbūr-e-vafā ho kar na khā dil kā fareb
zindagī par kāmrānī kā gumāñ rahne bhī de
naqsh-e-ġham ko kyoñ miTātī hai dil-e-ġhamgīn se
ye mirī ḳhūnīñ bahāreñ be-ḳhizāñ rahne bhī de
mere armanon ko pamal-e-ziyan rahne bhi de
shauq-e-manzil ko sharik-e-karwan rahne bhi de
wada-o-paiman-e-ulfat ko na de lafzon ka rang
dard se labrez nalon ko jawan rahne bhi de
dekh mujh ko hasrat-aluda nigahon se na dekh
ye fusun ye shoKH andaz-e-bayan rahne bhi de
hail-e-ulfat agar hai zindagi ki kashmakash
zindagi ki kashmakash ko darmiyan rahne bhi de
main jahan hun jis tarah hun KHub hun dil-shad hun
hasil-e-ulfat hain ye barbaadiyan rahne bhi de
wo guzishta aish-o-ishrat wo nashat-e-zindagi
KHwab tha is KHwab ki ranginiyan rahne bhi de
dost majbur-e-wafa ho kar na kha dil ka fareb
zindagi par kaamrani ka guman rahne bhi de
naqsh-e-gham ko kyon miTati hai dil-e-ghamgin se
ye meri KHunin bahaaren be-KHizan rahne bhi de
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
