lab tere lal-e-nab hain donon

lab tire la.al-e-nāb haiñ donoñ

par tamāmī itaab haiñ donoñ

ronā āñkhoñ kā roiye kab tak

phūTne hī ke baab haiñ donoñ

hai takalluf naqāb ve ruḳhsār

kyā chhupeñ āftāb haiñ donoñ

tan ke māmūre meñ yahī dil-o-chashm

ghar the do so ḳharāb haiñ donoñ

kuchh na pūchho ki ātish-e-ġham se

jigar-o-dil kabāb haiñ donoñ

sau jagah us kī āñkheñ paḌtī haiñ

jaise mast-e-sharāb haiñ donoñ

paañv meñ vo nasha talab kā nahīñ

ab to sarmast-e-ḳhvāb haiñ donoñ

ek sab aag ek sab paanī

dīda-o-dil azaab haiñ donoñ

bahs kaahe ko la.al-o-marjāñ se

us ke lab hī javāb haiñ donoñ

aage dariyā the dīda-e-tar 'mīr'

ab jo dekho sarāb haiñ donoñ

lab tere lal-e-nab hain donon

par tamami itab hain donon

rona aankhon ka roiye kab tak

phuTne hi ke bab hain donon

hai takalluf naqab we ruKHsar

kya chhupen aaftab hain donon

tan ke mamure mein yahi dil-o-chashm

ghar the do so KHarab hain donon

kuchh na puchho ki aatish-e-gham se

jigar-o-dil kabab hain donon

sau jagah us ki aankhen paDti hain

jaise mast-e-sharab hain donon

panw mein wo nasha talab ka nahin

ab to sarmast-e-KHwab hain donon

ek sab aag ek sab pani

dida-o-dil azab hain donon

bahs kahe ko lal-o-marjaan se

us ke lab hi jawab hain donon

aage dariya the dida-e-tar 'mir'

ab jo dekho sarab hain donon