mere KHuda mujhe itna to moatabar kar de
mire ḳhudā mujhe itnā to mo'atabar kar de
maiñ jis makān meñ rahtā huuñ us ko ghar kar de
ye raushnī ke ta.āqub meñ bhāgtā huā din
jo thak gayā hai to ab is ko muḳhtasar kar de
maiñ zindagī kī duā māñgne lagā huuñ bahut
jo ho sake to duāoñ ko be-asar kar de
sitāra-e-saharī Dūbne ko aayā hai
zarā koī mire sūraj ko bā-ḳhabar kar de
qabīla-vār kamāneñ kaḌakne vaalī haiñ
mire lahū kī gavāhī mujhe niDar kar de
maiñ apne ḳhvāb se kaT kar jiyūñ to merā ḳhudā
ujaaḌ de mirī miTTī ko dar-ba-dar kar de
mirī zamīn mirā āḳhirī havāla hai
so maiñ rahūñ na rahūñ is ko bārvar kar de
mere KHuda mujhe itna to mo'atabar kar de
main jis makan mein rahta hun us ko ghar kar de
ye raushni ke taaqub mein bhagta hua din
jo thak gaya hai to ab is ko muKHtasar kar de
main zindagi ki dua mangne laga hun bahut
jo ho sake to duaon ko be-asar kar de
sitara-e-sahari Dubne ko aaya hai
zara koi mere suraj ko ba-KHabar kar de
qabila-war kamanen kaDakne wali hain
mere lahu ki gawahi mujhe niDar kar de
main apne KHwab se kaT kar jiyun to mera KHuda
ujaD de meri miTTi ko dar-ba-dar kar de
meri zamin mera aaKHiri hawala hai
so main rahun na rahun is ko barwar kar de
This content features in following collection(s)
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
