mujhko to kuchh aur dikha hai aankhon ke us par

mujh ko to kuchh aur dikhā hai āñkhoñ ke us paar

tum batlāo āḳhir kyā hai āñkhoñ ke us paar

sapnā koī bikhar chukā hai āñkhoñ ke us paar

dariyā jaise TuuT paḌā hai āñkhoñ ke us paar

likkhūñ terā naam paḌhūñ to sāñval terā naam

terā hī bas naam likhā hai āñkhoñ ke us paar

bīnā.ī tere rastoñ ko thaam ke baiThī hai

tere ghar kā dar bhī vā hai āñkhoñ ke us paar

āñkhoñ ke is paar to jaise dariyā Thahar gayā

lekin sahrā bikhar gayā hai āñkhoñ ke us paar

din ta.abīr mirī chaukhaT par lā kar rakh degā

raat ne terā ḳhvāb bunā hai āñkhoñ ke us paar

rakh detā hai haath āñkhoñ par ġhair ko jab bhī dekhūñ

jaane aisā kaun chhupā hai āñkhoñ ke us paar

us ko jaatā dekh rahī haiñ hañs hañs kar ye āñkheñ

jaane kyā kuchh biit rahā hai āñkhoñ ke us paar

ab tū aa kar dekhegā to rotā jā.egā

ham ne aisā bain kiyā hai āñkhoñ ke us paar

bas ik ḳhvāb kī mayyat hai aur mātam-dārī hai

ham ne jā kar dekh liyā hai āñkhoñ ke us paar

ham ne terī āñkhoñ meñ rah kar mahsūs kiyā

kitnā dard chhupā rakkhā hai āñkhoñ ke us paar

ab duniyā ke chehroñ meñ tujh ko maiñ kyā dekhūñ

dil ne tujh ko dekh liyā hai āñkhoñ ke us paar

laakh zamāna bech aa.e tū laakh ho mujh se duur

lekin bilkul paas khaḌā hai āñkhoñ ke us paar

kyoñ na har ik jānib ab shahzāde kī sūrat ho

ham ne us ko naqsh kiyā hai āñkhoñ ke us paar

tujh ko to ābād lagā kartī haiñ ye āñkheñ

vīrānī kā shahr basā hai āñkhoñ ke us paar

ojhal ojhal rahne vaalā merī āñkhoñ se

mujh se kitnī baar milā hai āñkhoñ ke us paar

āñkhoñ se to nikal paḌā hai pal bhar meñ lekin

aañsū kā sāmān bachā hai āñkhoñ ke us paar

hairānī us paar se āḳhir kar baiThī hai kuuch

vo kitnā hairān khaḌā hai āñkhoñ ke us paar

tujh ko bhī sarshār na kar deñ āñkheñ to kahnā

ek tilism-e-hosh-rubā hai āñkhoñ ke us paar

patthar ho kar rah jā.eñgī āñkheñ muuñd 'rabāb'

ab bhī us kā ḳhvāb paḌā hai āñkhoñ ke us paar

mujh ko to kuchh aur dikha hai aankhon ke us par

tum batlao aaKHir kya hai aankhon ke us par

sapna koi bikhar chuka hai aankhon ke us par

dariya jaise TuT paDa hai aankhon ke us par

likkhun tera nam paDhun to sanwal tera nam

tera hi bas nam likha hai aankhon ke us par

binai tere raston ko tham ke baiThi hai

tere ghar ka dar bhi wa hai aankhon ke us par

aankhon ke is par to jaise dariya Thahar gaya

lekin sahra bikhar gaya hai aankhon ke us par

din tabir meri chaukhaT par la kar rakh dega

raat ne tera KHwab buna hai aankhon ke us par

rakh deta hai hath aankhon par ghair ko jab bhi dekhun

jaane aisa kaun chhupa hai aankhon ke us par

us ko jata dekh rahi hain hans hans kar ye aankhen

jaane kya kuchh bit raha hai aankhon ke us par

ab tu aa kar dekhega to rota jaega

hum ne aisa bain kiya hai aankhon ke us par

bas ek KHwab ki mayyat hai aur matam-dari hai

hum ne ja kar dekh liya hai aankhon ke us par

hum ne teri aankhon mein rah kar mahsus kiya

kitna dard chhupa rakkha hai aankhon ke us par

ab duniya ke chehron mein tujh ko main kya dekhun

dil ne tujh ko dekh liya hai aankhon ke us par

lakh zamana bech aae tu lakh ho mujh se dur

lekin bilkul pas khaDa hai aankhon ke us par

kyon na har ek jaanib ab shahzade ki surat ho

hum ne us ko naqsh kiya hai aankhon ke us par

tujh ko to aabaad laga karti hain ye aankhen

virani ka shahr basa hai aankhon ke us par

ojhal ojhal rahne wala meri aankhon se

mujh se kitni bar mila hai aankhon ke us par

aankhon se to nikal paDa hai pal bhar mein lekin

aansu ka saman bacha hai aankhon ke us par

hairani us par se aaKHir kar baiThi hai kuch

wo kitna hairan khaDa hai aankhon ke us par

tujh ko bhi sarshaar na kar den aankhen to kahna

ek tilism-e-hosh-ruba hai aankhon ke us par

patthar ho kar rah jaengi aankhen mund 'rabab'

ab bhi us ka KHwab paDa hai aankhon ke us par