mujhe wo chhoD kar jab se gaya hai intiha hai

mujhe vo chhoḌ kar jab se gayā hai intihā hai

rag-o-pai meñ fazā-e-karbalā hai intihā hai

mire hālāt haiñ nārāz is pe kyā karūñ maiñ

gurezāñ āsmānoñ se duā hai intihā hai

ġham o ālām haiñ yā hasrateñ haiñ zindagī meñ

tumhāre baad baaqī kyā bachā hai intihā hai

faqat tum hī nahīñ nārāz mujh se jān-e-jānāñ

mire andar kā insāñ tak ḳhafā hai intihā hai

kahīñ manzar asālīb-e-havas ke chār-sū haiñ

kahīñ pe ḳhūn-ālūda fazā hai intihā hai

ḳhamoshī toḌ de ai ḳhāliq-e-arz-o-samā ab

tirī maḳhlūq ban baiThī ḳhudā hai intihā hai

ġhazal jo tum pe 'tāhir' ne likhī thī jān-e-'tāhir'

vahī to zīnat-e-bām-e-baqā hai intihā hai

mujhe wo chhoD kar jab se gaya hai intiha hai

rag-o-pai mein faza-e-karbala hai intiha hai

mere haalat hain naraaz is pe kya karun main

gurezan aasmanon se dua hai intiha hai

gham o aalam hain ya hasraten hain zindagi mein

tumhaare baad baqi kya bacha hai intiha hai

faqat tum hi nahin naraaz mujh se jaan-e-jaanan

mere andar ka insan tak KHafa hai intiha hai

kahin manzar asalib-e-hawas ke chaar-su hain

kahin pe KHun-aluda faza hai intiha hai

KHamoshi toD de ai KHaliq-e-arz-o-sama ab

teri maKHluq ban baiThi KHuda hai intiha hai

ghazal jo tum pe 'tahir' ne likhi thi jaan-e-'tahir'

wahi to zinat-e-baam-e-baqa hai intiha hai