na nishat-e-chaara-sazi na malal-e-kam-nigahi

na nishāt-e-chāra-sāzī na malāl-e-kam-nigāhī

mujhe us nazar ne maarā be-gunāh be-gunāhī

sar-e-anjuman ġhanīmat hai butoñ kī kam-nigāhī

ki sukūn-e-dil pe aatī hai nazar se bhī tabāhī

ye siyāsat-e-bahārāñ hai ḳhizāñ kī be-panāhī

ki jo jal uThe nasheman to chaman na de gavāhī

tirī anjuman se bāhar ka.ī āftāb nikle

na dhulī kisī sahar se kisī raat kī siyāhī

tire shahr se nikalte hī mizāj-e-dahr lā hī

na vo rabt-e-shabnam-o-gul na vo bād-e-sub.h-gāhī

tire shahr-e-ārzū meñ yūñhī kaT ga.ī haiñ rāteñ

na junūñ kī aañkh jhapkī na ḳhirad ne lī jamāhī

diye terī rahguzāroñ ke jahāñ jahāñ jale haiñ

na charāġh-e-but-kada hai na charāġh-e-ḳhānqāhī

na sanam-kade kī manzil na haram kā āstāna

vo nazar jahāñ uThī hai vahīñ ruk ga.e haiñ raahī

koī 'shor' ye to pūchhe dar-o-bām-e-khusravī se

ye lahū se kis ke raushan hai charāġh-e-kaj-julāhī

na nishat-e-chaara-sazi na malal-e-kam-nigahi

mujhe us nazar ne mara be-gunah be-gunahi

sar-e-anjuman ghanimat hai buton ki kam-nigahi

ki sukun-e-dil pe aati hai nazar se bhi tabahi

ye siyasat-e-bahaaran hai KHizan ki be-panahi

ki jo jal uThe nasheman to chaman na de gawahi

teri anjuman se bahar kai aaftab nikle

na dhuli kisi sahar se kisi raat ki siyahi

tere shahr se nikalte hi mizaj-e-dahr la hi

na wo rabt-e-shabnam-o-gul na wo baad-e-subh-gahi

tere shahr-e-arzu mein yunhi kaT gai hain raaten

na junun ki aankh jhapki na KHirad ne li jamahi

diye teri rahguzaron ke jahan jahan jale hain

na charagh-e-but-kada hai na charagh-e-KHanqahi

na sanam-kade ki manzil na haram ka aastana

wo nazar jahan uThi hai wahin ruk gae hain rahi

koi 'shor' ye to puchhe dar-o-baam-e-khusrawi se

ye lahu se kis ke raushan hai charagh-e-kaj-julahi