نظر میں جذب شمع رخ کا جلوہ کر لیا میں نے

نظر میں جذب شمع رخ کا جلوہ کر لیا میں نے

دل تاریک میں آخر اجالا کر لیا میں نے

وہ یاد آئے تو اک گوشہ میں چپکے چپکے رو رو کر

دل رنجور کا کچھ بار ہلکا کر لیا میں نے

کبھی جو بت پرستی کے مزے لینے کو جی چاہا

تصور اس بت کافر ادا کا کر لیا میں نے

جو دل چاہا تو مستانہ خرامی کے تصور سے

جہان آرزو میں حشر برپا کر لیا میں نے

کسی کے عارض نوریں کے جلوے یاد کر کر کے

شب غم میں اندھیرے کا سہارا کر لیا میں نے

حدیں مٹ جائیں تاکہ امتیاز کفر و ایماں کی

جمال یار کو دانستہ سجدہ کر لیا میں نے

مجھے کیا فکر اب رنج جدائی کی انیسؔ آخر

جمال ہم نشیں کو دل میں پیدا کر لیا میں نے