nikohish hai saza fariyaadi-e-be-dad-e-dilbar ki

nikohish hai sazā fariyādi-e-be-dād-e-dilbar kī

mabādā ḳhanda-e-dandāñ-numā ho sub.h mahshar kī

rag-e-lailā ko ḳhāk-e-dasht-e-majnūñ reshgī baḳhshe

agar bove bajā-e-dāna dahqāñ nok nishtar kī

par-e-parvāna shāyad bādbān-e-kashtī-e-mai thā

huī majlis kī garmī se ravānī daur-e-sāġhar kī

karūñ be-dād-e-zauq-e-par-fishānī arz kyā qudrat

ki tāqat uḌ ga.ī uḌne se pahle mere shahpar kī

kahāñ tak ro.uuñ us ke ḳheme ke pīchhe qayāmat hai

mirī qismat meñ yā-rab kyā na thī dīvār patthar kī

ba-juz dīvāngī hotā na anjām-e-ḳhud-ārā.ī

agar paidā na kartā aa.ina zanjīr jauhar kī

ġhurūr-e-lutf-e-sāqī nashsha-e-be-bākī-e-mastāñ

nam-e-dāmān-e-isyāñ hai tarāvat mauj-e-kausar kī

mirā dil māñgte haiñ āriyat ahl-e-havas shāyad

ye jaanā chāhte haiñ aaj dāvat meñ samundar kī

'asad' juz āb-e-baḳhshīdan ze-dariyā ḳhizr ko kyā thā

Dubotā chashma-e-haivāñ meñ gar kashtī sikandar kī

nikohish hai saza fariyaadi-e-be-dad-e-dilbar ki

mabaada KHanda-e-dandan-numa ho subh mahshar ki

rag-e-laila ko KHak-e-dasht-e-majnun reshgi baKHshe

agar bowe baja-e-dana dahqan nok nishtar ki

par-e-parwana shayad baadban-e-kashti-e-mai tha

hui majlis ki garmi se rawani daur-e-saghar ki

karun be-dad-e-zauq-e-par-fishani arz kya qudrat

ki taqat uD gai uDne se pahle mere shahpar ki

kahan tak roun us ke KHeme ke pichhe qayamat hai

meri qismat mein ya-rab kya na thi diwar patthar ki

ba-juz diwangi hota na anjam-e-KHud-arai

agar paida na karta aaina zanjir jauhar ki

ghurur-e-lutf-e-saqi nashsha-e-be-baki-e-mastan

nam-e-daman-e-isyan hai tarawat mauj-e-kausar ki

mera dil mangte hain aariyat ahl-e-hawas shayad

ye jaana chahte hain aaj dawat mein samundar ki

'asad' juz aab-e-baKHshidan ze-dariya KHizr ko kya tha

Dubota chashma-e-haiwan mein gar kashti sikandar ki