pareshan ho ke meri KHak aaKHir dil na ban jae

pareshāñ ho ke merī ḳhaak āḳhir dil na ban jaa.e

jo mushkil ab hai yā rab phir vahī mushkil na ban jaa.e

na kar deñ mujh ko majbūr-e-navā firdaus meñ hūreñ

mirā soz-e-darūñ phir garmi-e-mahfil na ban jaa.e

kabhī chhoḌī huī manzil bhī yaad aatī hai raahī ko

khaTak sī hai jo siine meñ ġham-e-manzil na ban jaa.e

banāyā ishq ne dariyā-e-nā-paidā-karāñ mujh ko

ye merī ḳhud-nigah-dārī mirā sāhil na ban jaa.e

kahīñ is ālam-e-be-rañg-o-bū meñ bhī talab merī

vahī afsāna-e-dumbāla-e-mahmil na ban jaa.e

urūj-e-ādam-e-ḳhākī se anjum sahme jaate haiñ

ki ye TuuTā huā taarā mah-e-kāmil na ban jaa.e

pareshan ho ke meri KHak aaKHir dil na ban jae

jo mushkil ab hai ya rab phir wahi mushkil na ban jae

na kar den mujh ko majbur-e-nawa firdaus mein huren

mera soz-e-darun phir garmi-e-mahfil na ban jae

kabhi chhoDi hui manzil bhi yaad aati hai rahi ko

khaTak si hai jo sine mein gham-e-manzil na ban jae

banaya ishq ne dariya-e-na-paida-karan mujh ko

ye meri KHud-nigah-dari mera sahil na ban jae

kahin is aalam-e-be-rang-o-bu mein bhi talab meri

wahi afsana-e-dumbaala-e-mahmil na ban jae

uruj-e-adam-e-KHaki se anjum sahme jate hain

ki ye TuTa hua tara mah-e-kaamil na ban jae