qatl ushshaq kiya karte hain

qatl ushshāq kiyā karte haiñ

but kahāñ ḳhauf-e-ḳhudā karte haiñ

sar mirā tan se judā karte haiñ

dard kī aap davā karte haiñ

ātish-e-ġham ne magar phūñk diyā

dil se shole jo uThā karte haiñ

jāma-e-surḳh tirā dekh ke gul

pairahan apnā qabā karte haiñ

ḳhuun rote haiñ chaman meñ bulbul

ham guloñ se jo hañsā karte haiñ

ḳham-e-abrū-e-sanam ko dekheñ

ham ye kaabe meñ duā karte haiñ

apne saaqī ko shab-e-furqat meñ

paanī pī pī ke duā karte haiñ

roz do-chār kā ḳhuun kartā hai

dast-o-pā surḳh rahā karte haiñ

mar ga.e par hadaf-e-tīr hai ḳhaak

jā-ba-jā tode banā karte haiñ

dahan-e-zaḳhm se ham qātil ke

teġh ko chuum liyā karte haiñ

shor-e-mahshar se Dareñ kyā āshiq

aise hañgāme huā karte haiñ

hote haiñ dil meñ nihāyat nādim

ḳhuun jo be-jurm kiyā karte haiñ

mehñdī malne ke bahāne qātil

kaf-e-afsos malā karte haiñ

evaz-e-bāda ġham-e-sāqī meñ

ḳhūn-e-dil apnā piyā karte haiñ

paañv tak haath na pahuñchā us kī

haath haihāt malā karte haiñ

jo hameñ bhuul gayā hai zālim

us ko ham yaad kiyā karte haiñ

nā-tavānī ne diye par ham ko

jīvan-e-par-e-kāh uḌā karte haiñ

ham bane chāñd ke haale 'goyā' haiñ

gird us mah ke rahā karte haiñ

qatl ushshaq kiya karte hain

but kahan KHauf-e-KHuda karte hain

sar mera tan se juda karte hain

dard ki aap dawa karte hain

aatish-e-gham ne magar phunk diya

dil se shole jo uTha karte hain

jama-e-surKH tera dekh ke gul

pairahan apna qaba karte hain

KHun rote hain chaman mein bulbul

hum gulon se jo hansa karte hain

KHam-e-abru-e-sanam ko dekhen

hum ye kabe mein dua karte hain

apne saqi ko shab-e-furqat mein

pani pi pi ke dua karte hain

roz do-chaar ka KHun karta hai

dast-o-pa surKH raha karte hain

mar gae par hadaf-e-tir hai KHak

ja-ba-ja tode bana karte hain

dahan-e-zaKHm se hum qatil ke

tegh ko chum liya karte hain

shor-e-mahshar se Daren kya aashiq

aise hangame hua karte hain

hote hain dil mein nihayat nadim

KHun jo be-jurm kiya karte hain

mehndi malne ke bahane qatil

kaf-e-afsos mala karte hain

ewaz-e-baada gham-e-saqi mein

KHun-e-dil apna piya karte hain

panw tak hath na pahuncha us ki

hath haihat mala karte hain

jo hamein bhul gaya hai zalim

us ko hum yaad kiya karte hain

na-tawani ne diye par hum ko

jiwan-e-par-e-kah uDa karte hain

hum bane chand ke haale 'goya' hain

gird us mah ke raha karte hain