sahra mein ghaTa ka muntazir hun

sahrā meñ ghaTā kā muntazir huuñ

phir us kī vafā kā muntazir huuñ

ik baar na jis ne muḌ ke dekhā

us jān-e-sabā kā muntazir huuñ

baiThā huuñ durūn-e-ḳhāna-e-ġham

sailāb-e-balā kā muntazir huuñ

jān-e-āb-e-baqā khoj meñ hai

maiñ mauj-e-fanā kā muntazir huuñ

khil jā.ūñgā apne aap se maiñ

tahsīn-e-sabā kā muntazir huuñ

is daur meñ ḳhvāhish-e-tarab hai

madfan meñ havā kā muntazir huuñ

maazī kī sazā bhugat rahā huuñ

fardā kī sazā kā muntazir huuñ

shāyad ki vahāñ mafar ho ġham se

tasḳhīr-e-ḳhalā kā muntazir huuñ

hāthoñ meñ hai mere dāman-e-shab

sūraj kī sadā kā muntazir huuñ

barsoñ se khaḌā huuñ haath uThā.e

tāsīr-e-duā kā muntazir huuñ

merā to ḳhudā kabhī nahīñ thā

maiñ kis ke ḳhudā kā muntazir huuñ

kahte haiñ jise 'nazar' musāfir

us ābla-pā kā muntazir huuñ

sahra mein ghaTa ka muntazir hun

phir us ki wafa ka muntazir hun

ek bar na jis ne muD ke dekha

us jaan-e-saba ka muntazir hun

baiTha hun durun-e-KHana-e-gham

sailab-e-bala ka muntazir hun

jaan-e-ab-e-baqa khoj mein hai

main mauj-e-fana ka muntazir hun

khil jaunga apne aap se main

tahsin-e-saba ka muntazir hun

is daur mein KHwahish-e-tarab hai

madfan mein hawa ka muntazir hun

mazi ki saza bhugat raha hun

farda ki saza ka muntazir hun

shayad ki wahan mafar ho gham se

tasKHir-e-KHala ka muntazir hun

hathon mein hai mere daman-e-shab

suraj ki sada ka muntazir hun

barson se khaDa hun hath uThae

tasir-e-dua ka muntazir hun

mera to KHuda kabhi nahin tha

main kis ke KHuda ka muntazir hun

kahte hain jise 'nazar' musafir

us aabla-pa ka muntazir hun