ai lamho main kyun lamha-e-larzan hun batao

ai lamho maiñ kyuuñ lamha-e-larzāñ huuñ batāo

kis jāgte bātin kā maiñ imkāñ huuñ batāo

maiñ ek khule bāb-e-tasavvur kī rasā.ī

maiñ kis ke liye is qadar āsāñ huuñ batāo

kis lams kī tahrīr huuñ mehrāb-e-havā par

kis lafz kā maf.hūm-e-farāvāñ huuñ batāo

kis manzar-e-isbāt ke hoñToñ kī ziyā huuñ

kis chup kī maiñ āvāz-e-farāvāñ huuñ batāo

maiñ silsila-dar-silsila ik nāma-e-raushan

kis harf-e-bashārat kā dabistāñ huuñ batāo

kis bosa-e-be-sāḳhta kā huuñ maiñ taqaddus

kis sīna-e-be-dāġh kā armāñ huuñ batāo

maiñ sub.h ke nazzāra-e-avval kī ḳhunuk bū

maiñ kis kā ye sarmāya-e-arzāñ huuñ batāo

ai lamho main kyun lamha-e-larzan hun batao

kis jagte baatin ka main imkan hun batao

main ek khule bab-e-tasawwur ki rasai

main kis ke liye is qadar aasan hun batao

kis lams ki tahrir hun mehrab-e-hawa par

kis lafz ka mafhum-e-farawan hun batao

kis manzar-e-isbaat ke honTon ki ziya hun

kis chup ki main aawaz-e-farawan hun batao

main silsila-dar-silsila ek nama-e-raushan

kis harf-e-bashaarat ka dabistan hun batao

kis bosa-e-be-saKHta ka hun main taqaddus

kis sina-e-be-dagh ka arman hun batao

main subh ke nazzara-e-awwal ki KHunuk bu

main kis ka ye sarmaya-e-arzan hun batao