sawad-e-manzar-e-KHwab-e-pareshan kaun dekhega

savād-e-manzar-e-ḳhvāb-e-pareshāñ kaun dekhegā

asīr-e-zulf ho kar shām-e-hijrāñ kaun dekhegā

guloñ kī dilkashī fasl-e-bahārāñ kaun dekhegā

na hoñge jab hamīñ rañg-e-gulistāñ kaun dekhegā

shab-e-ġham tum na aa.e ġham nahīñ ġham hai to ye ġham hai

mire dāman pe ashkoñ kā charāġhāñ kaun dekhegā

gudāz-e-sham.a kī sūrat javāz-e-ġham karo paidā

ye parvāno tumhārā soz-e-pinhāñ kaun dekhegā

qayāmat meñ laboñ par shikva-hā-e-pur-jafā lā kar

tirī ma.asūm fitrat ko pashemāñ kaun dekhegā

yaqīnan shauq ke pardoñ ko bhī āñkhoñ se uThnā hai

nahīñ to hashr meñ kal rū-e-jānāñ kaun dekhegā

garebāñ phaaḌ kar 'jumbish' chalo phūloñ kī mahfil meñ

ye sahrā hai yahāñ hāl-e-pareshāñ kaun dekhegā

sawad-e-manzar-e-KHwab-e-pareshan kaun dekhega

asir-e-zulf ho kar sham-e-hijran kaun dekhega

gulon ki dilkashi fasl-e-bahaaran kaun dekhega

na honge jab hamin rang-e-gulistan kaun dekhega

shab-e-gham tum na aae gham nahin gham hai to ye gham hai

mere daman pe ashkon ka charaghan kaun dekhega

gudaz-e-shama ki surat jawaz-e-gham karo paida

ye parwano tumhaara soz-e-pinhan kaun dekhega

qayamat mein labon par shikwa-ha-e-pur-jafa la kar

teri masum fitrat ko pasheman kaun dekhega

yaqinan shauq ke pardon ko bhi aankhon se uThna hai

nahin to hashr mein kal ru-e-jaanan kaun dekhega

gareban phaD kar 'jumbish' chalo phulon ki mahfil mein

ye sahra hai yahan haal-e-pareshan kaun dekhega