shairi baat nahin garm-e-suKHan hone ki

shā.irī baat nahīñ garm-e-suḳhan hone kī

shart hī aur hai shā.ista-e-fan hone kī

maiñ ki har-dam mujhe bālīdgī-e-rūh kī fikr

ruuh ko fikr hai vārasta-e-tan hone kī

ram-ba-ram silsila-e-mauj-e-ġhazālān-e-ḳhayāl

dasht-e-ġhurbat ko bashārat ho vatan hone kī

partav-e-rañg se gulgūñ huā māmūra-e-chashm

dhuum hai kū-e-tamāshā ke chaman hone kī

haq-parastī ko yahāñ kaun hai āmāda-e-dār

kis ko taufīq hai be-gor-o-kafan hone kī

yā bachegā na sahar tak koī darmānda-e-shab

yā sahar hī nahīñ ḳhākam-ba-dahan hone kī

dard kī sāl-girah ḳhair se guzre 'gauhar'

aa ga.ī raat vahī chāñd-gahan hone kī

shairi baat nahin garm-e-suKHan hone ki

shart hi aur hai shaista-e-fan hone ki

main ki har-dam mujhe baalidgi-e-ruh ki fikr

ruh ko fikr hai warasta-e-tan hone ki

ram-ba-ram silsila-e-mauj-e-ghazalan-e-KHayal

dasht-e-ghurbat ko bashaarat ho watan hone ki

partaw-e-rang se gulgun hua mamura-e-chashm

dhum hai ku-e-tamasha ke chaman hone ki

haq-parasti ko yahan kaun hai aamada-e-dar

kis ko taufiq hai be-gor-o-kafan hone ki

ya bachega na sahar tak koi darmanda-e-shab

ya sahar hi nahin KHakam-ba-dahan hone ki

dard ki sal-girah KHair se guzre 'gauhar'

aa gai raat wahi chand-gahan hone ki