shahid-e-arman paDe hain bismil khaDa wo talwar ka dhani hai

shahīd-e-armāñ paḌe haiñ bismil khaḌā vo talvār kā dhanī hai

idhar to ye qatl-e-ām dekhā udhar vo kaisī kaTā-chhanī hai

huā hai nairañg aaj kaisā ye dil meñ qātil ke kyā Thanī hai

jidhar se guzrā zabāñ se niklā ye kushtanī hai vo kushtanī hai

bigaḌ ke ham ko bigāḌ Daalā sañvārnā hī tumheñ na aayā

bano jo munsif batā.eñ dilbar ki is bigaḌne se kyā banī hai

kabhī hañsātī hai yaad terī kabhī rulātā hai hijr terā

ye qābil-e-dīd hai tamāshā ye sair-e-be-mehr dīdanī hai

sunā hai maqtal meñ aaj koī qatīl-e-hasrat shahīd hogā

huī jo shohrat ye shahr meñ hai har ik taraf ek sansanī hai

karam hai dariyā-diloñ kī zīnat kahāñ baḳhīloñ kī hai ye tīnat

use tavañgar nahīñ kaheñge jo koī mohtāj-e-dil ġhanī hai

shikast-e-paimāñ kā ham ko 'aadī kiyā hai ik mast-e-nosh-e-lab ne

ba-maslahat ham hue haiñ taa.ib ye tauba āḳhir shikastnī hai

dikhā ke ham ko jamāl-e-ra.anā kiyā hai kyuuñ rah-navard-e-vahshat

bane the ḳhud rahnumā hamāre ye rahbarī meñ bhī rahzanī hai

tarīq un kā hī sulh-e-kul hai jo be-hama bā-hama nazar haiñ

hameñ ye bartāv ne dikhāyā ki dostī meñ bhī dushmanī hai

vafā-shi'ārī hai jāñ-nisārī hai uzr-e-shikva na arz-e-matlab

hamīñ haiñ ik be-nazīr tālib harīf jo hai vo yak-fanī hai

vo aayā turbat pe bevafā gul har ik se afsurda ho ke pūchhā

ye kis kī mash.had pe hai charāġhāñ jo ibrat-añgez raushnī hai

fanā-e-qalbī hai fat.h-e-ainī huā hai gar mahv sharh-e-sadrī

yahī hai miftāh-e-dil-kushā.ī ye kashf-e-bātin kī jāñkanī hai

hue jo ye mubtalā-e-ulfat asiir dām-e-visāl ke haiñ

havā-e-zulf-e-ḳhayāl-e-jānāñ banī huī tauq-e-gardnī hai

ye kis qalandar ko maar Daalā ġhazab kiyā jāma-posh-e-naḳhvat

khaḌā huā ro rahā hai jazba girī huī pāk-dāmanī hai

kabhī na hoñge murīd-e-jiddat nahīñ haiñ mushtāq-e-husn-e-bid.at

hamārā mashrab hai sūfiyāna hamārā maz.hab sanātanī hai

kiyā hai ibrat-misāl kaisā ḳhayāl-e-ibrat-nazar ne ham ko

kareñ ta.alluq kisī se kyā ham jo shakl dekhī guzishtanī hai

sifāt meñ zaat hai numāyāñ huī vo bāliġh-nazar hai nisbat

kiyā hai mahv-e-jamāl-e-jānāñ ye sair-qalbī kī raushnī hai

na hoñ ġharābt-asar ye ai dil nuqūsh-e-nairañg-e-shān-e-fitrat

koī huā be-niyāz-e-ālam koī hai muflis koī ġhanī hai

hue na īsār o buzl se ai karīm ham mustafīz ab tak

tumhārā sheva jo hai saḳhā kā pasand-e-aḳhlāq-e-mohsinī hai

firāqe-e-gul se jo nāla-kash hai qafas meñ bulbul shahīd-e-jalva

bahār-e-gulshan ḳhizāñ-numā hai junūñ-zada abr-e-bahmanī hai

milā na jām-e-sharāb 'sāqī' koī qadah bañg kā 'atā ho

hamāre pīr-e-muġhāñ ḳhizar haiñ subū meñ sabzī bhī to chhanī hai

shahid-e-arman paDe hain bismil khaDa wo talwar ka dhani hai

idhar to ye qatl-e-am dekha udhar wo kaisi kaTa-chhani hai

hua hai nairang aaj kaisa ye dil mein qatil ke kya Thani hai

jidhar se guzra zaban se nikla ye kushtani hai wo kushtani hai

bigaD ke hum ko bigaD Dala sanwarna hi tumhein na aaya

bano jo munsif bataen dilbar ki is bigaDne se kya bani hai

kabhi hansati hai yaad teri kabhi rulata hai hijr tera

ye qabil-e-did hai tamasha ye sair-e-be-mehr didani hai

suna hai maqtal mein aaj koi qatil-e-hasrat shahid hoga

hui jo shohrat ye shahr mein hai har ek taraf ek sansani hai

karam hai dariya-dilon ki zinat kahan baKHilon ki hai ye tinat

use tawangar nahin kahenge jo koi mohtaj-e-dil ghani hai

shikast-e-paiman ka hum ko 'adi kiya hai ek mast-e-nosh-e-lab ne

ba-maslahat hum hue hain taib ye tauba aaKHir shikastni hai

dikha ke hum ko jamal-e-rana kiya hai kyun rah-naward-e-wahshat

bane the KHud rahnuma hamare ye rahbari mein bhi rahzani hai

tariq un ka hi sulh-e-kul hai jo be-hama ba-hama nazar hain

hamein ye bartaw ne dikhaya ki dosti mein bhi dushmani hai

wafa-shi'ari hai jaan-nisari hai uzr-e-shikwa na arz-e-matlab

hamin hain ek be-nazir talib harif jo hai wo yak-fani hai

wo aaya turbat pe bewafa gul har ek se afsurda ho ke puchha

ye kis ki mashhad pe hai charaghan jo ibrat-angez raushni hai

fana-e-qalbi hai fath-e-aini hua hai gar mahw sharh-e-sadri

yahi hai miftah-e-dil-kushai ye kashf-e-baatin ki jaankani hai

hue jo ye mubtala-e-ulfat asir dam-e-visal ke hain

hawa-e-zulf-e-KHayal-e-jaanan bani hui tauq-e-gardni hai

ye kis qalandar ko mar Dala ghazab kiya jama-posh-e-naKHwat

khaDa hua ro raha hai jazba giri hui pak-damani hai

kabhi na honge murid-e-jiddat nahin hain mushtaq-e-husn-e-bidat

hamara mashrab hai sufiyana hamara mazhab sanatani hai

kiya hai ibrat-misal kaisa KHayal-e-ibrat-nazar ne hum ko

karen talluq kisi se kya hum jo shakl dekhi guzishtani hai

sifat mein zat hai numayan hui wo baaligh-nazar hai nisbat

kiya hai mahw-e-jamal-e-jaanan ye sair-qalbi ki raushni hai

na hon gharabt-asar ye ai dil nuqush-e-nairang-e-shan-e-fitrat

koi hua be-niyaz-e-alam koi hai muflis koi ghani hai

hue na isar o buzl se ai karim hum mustafiz ab tak

tumhaara shewa jo hai saKHa ka pasand-e-aKHlaq-e-mohsini hai

firaqe-e-gul se jo nala-kash hai qafas mein bulbul shahid-e-jalwa

bahaar-e-gulshan KHizan-numa hai junun-zada abr-e-bahmani hai

mila na jam-e-sharab 'saqi' koi qadah bang ka 'ata ho

hamare pir-e-mughan KHizar hain subu mein sabzi bhi to chhani hai