shikast-e-rang-e-tamanna ko arz-e-haal kahun

shikast-e-rañg-e-tamannā ko arz-e-hāl kahūñ

sukūt-e-lab ko taqāzā-e-sad-savāl kahūñ

hazār ruḳh tire milne ke haiñ na milne meñ

kise firāq kahūñ aur kise visāl kahūñ

mujhe yaqīñ hai ki kuchh bhī chhupā nahīñ un se

unheñ ye zid ki dil-e-mubtalā kā haal kahūñ

tū be-misāl sahī phir bhī dil ko hai isrār

adā adā ko tirī ālam-e-misāl kahūñ

mizāj-e-mahfil-e-gītī agar na barham ho

to rañg-e-aish ko gard-e-ruḳh-e-malāl kahūñ

havā ke dosh pe hai ek shola-e-larzāñ

kahūñ to kyā tirī tahzīb kā ma.aal kahūñ

vo ek ḳhvāb jo tāmīr aap hai apnī

maiñ kyā haqīqat-e-rānā.i-e-ḳhayāl kahūñ

ġhazal kī baat rahegī vahīñ agar sau baar

javāb-e-shoḳhī o rānā.i-e-ġhazāl kahūñ

'ravish' ye sādgi-e-ishq kā taqāzā hai

kamāl-e-hosh ko iḳhlās kā zavāl kahūñ

shikast-e-rang-e-tamanna ko arz-e-haal kahun

sukut-e-lab ko taqaza-e-sad-sawal kahun

hazar ruKH tere milne ke hain na milne mein

kise firaq kahun aur kise visal kahun

mujhe yaqin hai ki kuchh bhi chhupa nahin un se

unhen ye zid ki dil-e-mubtala ka haal kahun

tu be-misal sahi phir bhi dil ko hai israr

ada ada ko teri aalam-e-misal kahun

mizaj-e-mahfil-e-giti agar na barham ho

to rang-e-aish ko gard-e-ruKH-e-malal kahun

hawa ke dosh pe hai ek shola-e-larzan

kahun to kya teri tahzib ka maal kahun

wo ek KHwab jo tamir aap hai apni

main kya haqiqat-e-ranai-e-KHayal kahun

ghazal ki baat rahegi wahin agar sau bar

jawab-e-shoKHi o ranai-e-ghazal kahun

'rawish' ye sadgi-e-ishq ka taqaza hai

kamal-e-hosh ko iKHlas ka zawal kahun