ta-hadd-e-nazar chandni is tarah khuli hai

tā-hadd-e-nazar chāñdnī is tarah khulī hai

jaise tire hoñToñ kī hañsī phail ga.ī hai

utnī hī nigāhoñ kī mirī pyaas baḌhī hai

jitnī ki tujhe dekh ke taskīn huī hai

kahne ko to ḳhvāboñ meñ mirī umr kaTī hai

lekin mire ḳhvāboñ kī bahut umr baḌī hai

zulfoñ pe rukūñ yā tire ruḳhsār pe Thahrūñ

jis jā se guzar kījiye ik dhuum machī hai

ik umr to guzrī hai tujhe dekhte lekin

jab dekhiye tab baat koī tujh meñ na.ī hai

lauT aayā huuñ jā jā ke tire dar se ka.ī baar

jab terī mohabbat meñ mirī jaañ pe banī hai

vo ilm ho yā fan ho koī chiiz ho yaaro

shāmil na ho gar husn to har shai meñ kamī hai

pākīzgī-e-dil ke sivā kuchh nahīñ firdaus

dozaḳh hai vo dil jis meñ mohabbat kī kamī hai

jis dar ke sivā hech thī taḳhlīq-e-do-ālam

us dar se 'shahāb' aas bhī ab TuuT ga.ī hai

ta-hadd-e-nazar chandni is tarah khuli hai

jaise tere honTon ki hansi phail gai hai

utni hi nigahon ki meri pyas baDhi hai

jitni ki tujhe dekh ke taskin hui hai

kahne ko to KHwabon mein meri umr kaTi hai

lekin mere KHwabon ki bahut umr baDi hai

zulfon pe rukun ya tere ruKHsar pe Thahrun

jis ja se guzar kijiye ek dhum machi hai

ek umr to guzri hai tujhe dekhte lekin

jab dekhiye tab baat koi tujh mein nai hai

lauT aaya hun ja ja ke tere dar se kai bar

jab teri mohabbat mein meri jaan pe bani hai

wo ilm ho ya fan ho koi chiz ho yaro

shamil na ho gar husn to har shai mein kami hai

pakizgi-e-dil ke siwa kuchh nahin firdaus

dozaKH hai wo dil jis mein mohabbat ki kami hai

jis dar ke siwa hech thi taKHliq-e-do-alam

us dar se 'shahab' aas bhi ab TuT gai hai